नवी दिल्ली - डॉलरच्या तुलनेत रुपयाची विक्रमी घसरण झाल्यानंतर विरोधक सरकारवर हल्लाबोल करत आहेत. पंतप्रधान नरेंद्र मोदी यांच्या जुन्या भाषणाचे व्हिडीओ शेअर करून विरोधक भाजपवर निशाणा साधत आहेत. त्यातच आज अर्थमंत्री निर्मला सीतारामन यांनी रुपयाच्या घसरणीवर अजब विधान केलं आहे. (nirmala sitharaman news in Marathi)

सीतारामन म्हणाल्या की, रुपयाचे अवमूल्यन होत नसून डॉलर मजबूत होत आहे. तसेच रुपया इतर देशांच्या चलनाच्या तुलनेत चांगल्या स्थितीत आहे. रुपयाची घसरण रोखण्यासाठी आरबीआय सर्वतोपरी प्रयत्न करत असल्याचेही सीतारामन यांनी सांगितले.

निर्मला सीतारामन या अमेरिकेच्या अधिकृत दौऱ्यावर आहेत. वॉशिंग्टन डीसीमध्ये पत्रकार परिषदेच्या पत्रकाराने त्यांना रुपयाच्या घसरणीबद्दल विचारले तेव्हा अर्थमंत्री म्हणाल्या, की मी याकडे घसरण म्हणून पाहात नाही. रुपयाची घसरण होतेय अस न पाहता, डॉलर मजबूत होतोय. त्यामुळे सहाजिकच डॉलरच्या तुलनेतील चलने कमकुवत होतील, असंही सीतारामन यांनी म्हटलं.

अर्थमंत्र्यांचे हे वक्तव्य समोर आल्यानंतर सोशल मीडियावर लोक प्रतिक्रिया देत आहेत. एका नेटकऱ्याने म्हटलं की, डॉलर मजबूत होण्यापासून आपण कसे रोखू शकतो? दुसऱ्या नेटकऱ्याने म्हटलं की, 'थंडी वाढत नाही, तर सहनशीलता कमी होत आहे'च्या प्रचंड यशानंतर, रुपयाची घसरण होत नसून डॉलर मजबूत होतोय!