रोहिणी गोसावी : सकाळ वृत्तसेवा

मुंबई : देशातला मोठा चंदन तस्कर (Sandalwood smuggler) म्हणून ओळख असलेल्या बादशाह मलिकला (Badshah Malik arrested) इडीनं (enforcement Directorate) अटक केली आहे. कुर्ला इथल्या त्याच्या घरावर इडीनं सोमवारी छापा (Ed raids at home) मारला होता, त्यानंतर त्याला चौकशीसाठी ताब्यात घेऊन रात्री त्याला अटक करण्यात आली़.

बादशाह मलिक हा अंडरवर्ल्डसोबत मिळून जगभरात लाल चंदनाची तस्करी करत असल्याची माहिती आहे. चंदन तस्करीच्या 2015 सालच्या प्रकरणाशी संबंधीत ही कारवाई असल्याचं बोललं जात आहे. 2015 मध्ये डिआरआयनं एक रॅकेट उद्ध्वस्त केलं होतं. ज्यात अतिशय दुर्मिळ आणि महाग असलेलं लाल चंदन तस्करी करुन परदेशात पाठवण्यात येत होतं.

मुंबईच्या एका शिपींग कंपनीच्या माध्यमातून जवळपास 8000 मेट्रीक टनाहून अधिक लाल चंदनाची तस्करी करण्यात येत होती. त्याची तेव्हाची किंमत 3 कोटींपेक्षा जास्त होती. डिआरआयनं न्हावाशेवा बंदरावर कंटेनरला ऱोखून ही तस्करी थांबवली होती. यातच बादशाह मलिक आणि विजय पुजारीवर गुन्हा दाखल करण्यात आला होता. याआधी दोन वेळा बादशाह मलिकला अटक करण्यात आली होती, पण काही दिवसांतच तो जामिनावर बाहेर येतो, आणि पुन्हा तस्करी करायला सुरुवात करतो, अशी माहिती सुत्रांनी दिली आहे.