नवी दिल्ली - भारतात शालेय अभ्यासक्रमामध्ये भाषा विषय शिकवले जातात. यामध्ये मातृभाषेचा समावेश आहे. याशिवाय संस्कृतसारख्या दररोज बोलल्या न जाणाऱ्या भाषाही आहेत. यावर वादग्रस्त कमेंट केल्यानंतर मोटिव्हेशनल स्पिकर संदीप माहेश्वरीविरोधात ट्विटरवर ट्रेंड सुरु झाला आहे. यामध्ये संदीप माहेश्वरीने माफी मागावी अशी मागणी करण्यात येत आहे. ज्या भाषा बोलल्या जात नाहीत त्यांचा अभ्यास करून दबाव का घ्यायचा असं सांगताना संदीप माहेश्वरींनी केलेलं वक्तव्य आता वादाच्या भोवऱ्यात सापडलं आहे. 

मला कोणाशी संस्कृतमध्ये बोलायचं नाहीय. संस्कृतमध्ये जी काही पुस्तकं लिहिण्यात आली आहेत ती आता हिंदी आणि इंग्लिशमध्ये भाषांतर झाली आहेत. तर मी हिंदी किंवा इंग्लिशमधे वाचेन. जबरदस्तीने संस्कृत का शिकवत आहात? म्हणून संस्कृत हद्दपार केलं जावं. त्यामुळे असलेला दबाव कमी होईल. विचार करा तुम्ही संस्कृत, फ्रेंच शिकवत आहात. त्यात पुन्हा वेगळे क्लास घेत आहात. एवढं करूनही त्याचा काही वापर केला जात नाही. तुमच्या आई-वडिलांना कधी पाहिलं आहे का संस्कृतमध्ये बोलताना? त्वम किम करिश्यामी? अहम खाना बनस्यामी 

संदीप माहेश्वरी यांचा व्हिडिओ व्हायरल झाल्यानंतर ट्विटरवर त्यांनी माफी मागावी असा ट्रेंड सुरु झाला आहे. संदीप माहेश्वरी यांचं हे वक्तव्य मुर्खपणा असल्याचं युजर्सनी म्हटलं आहे. एका युजरनं म्हटलं की, चर्चा कशावरही असली तरी तुम्ही संस्कृत भाषेची खिल्ली उडवू शकत नाही. आपण गणितातील त्रिकोणमितीसारखी प्रकरणं फक्त शिकतो त्याचा दररोजच्या जीवनात वापर करत नाही. याचा अर्थ असा नाही की आपण अभ्याक्रमातून ते काढून टाकावं. 

दरम्यान, काही युजर्सनी संदीप माहेश्वरींनी माफी मागण्याची गरज नाही असंही म्हटलं आहे. त्यांचा पूर्ण व्हिडिओ न पाहता कोणत्याही प्रकारचे आरोप कऱणं चुकीचं आहे असं म्हणत युजरने पूर्ण व्हिडिओ शेअर केला आहे. 

संस्कृत ही देवांची भाषा आहे. सर्व भाषांची निर्मिती यातूनच झाल्याचं म्हटलं जातं. फक्त संस्कृत व्याकरण शिकून भारतीय भाषा शिकता येतात. संदीप माहेश्वरींचा आदर आहे पण त्यांनी जे म्हटलं ते कधीच स्वीकारता येणार नाही असं एका युजरनं म्हटलं आहे.