Chinese Village New Satellite Images : चीनच्या कुरघोड्या काही केल्या कमी होताना दिसत नसून, आता चीनने भूतानच्या बाजूने असलेल्या डोकलाम पठाराजवळ गाव वसवल्याचे समोर आले आहे. उपग्रहाच्या सहाय्याने काढण्यात आलेल्या फोटोतून ही धक्कादायक बाब समोर आली आहे. भारताच्या राजकीय हिताच्या दृष्टीने हे क्षेत्र अत्यंत महत्त्वाचे मानले जाते. ही छायाचित्रे MAXAR कंपनीने काढली आहेत. (India China Border Crises News In Marathi)

उपग्रहाच्या फोटोतून चीन अमो चू नदीच्या खोऱ्यात आणखी एक गाव वसवत असल्याचे समोर आले आहे. एवढेच नव्हे तर, या गावाची जवळपास पूर्णत्वाकडे आल्याचेही या फोटोतून दिसून येत आहे. त्याचवेळी चीनने दक्षिण भागात तिसऱ्या गावाचीदेखील निर्मिती सुरू केली असून, फोटोंमध्ये 6 इमारतींचा पायाही दिसत आहे.

याशिवाय इतर अनेक बांधकामांचे कामही वेगाने सुरू असल्याचे उपग्रहाच्या फोटोतून स्पष्ट होत आहे. इतकेच नव्हे तर, MEXAR ने काढलेल्या फोटोंमध्ये गावातील प्रत्येक घराच्या दारात कार उभ्या असलेल्या दिसून येत आहे. दरम्यान, नव्याने समोर आलेल्या या फोटोंवर अद्यापपर्यंत लष्कराकडून कोणतीही प्रतिक्रिया देण्यात आलेली नाही.