H3N2 Virus symptoms: देशामध्ये कोरोनाचा धोका अजूनही पूर्णपणे टळलेला नसतांना आणखी एक धोका देशासमोर उभा राहिले आहे. H3N2 विषाणूच्या संसर्गामुळे पहिले दोन बळी गेल्याची माहिती असून त्यामुळे केंद्र सरकार अलर्ट मोडवर आलं आहे.

एज३एन२ विषाणूची लागण होऊन दोन जणांचा मृत्यू झाल्याची बातमी समोर आली आहे. एनडीटीव्हीच्या रिपोर्टनुसार, यापैकी एक केस हरियाणातील आहे, तर दुसरी केस दक्षिण भारतातील कर्नाटक राज्यातील आहे. या विषाणूच्या संसर्गामध्ये ताप, सर्दी, घसा खवखवणं आणि डोळ्यात जळजळ होणं अशी लक्षणं आढळतात.

या व्हायरसमुळे संक्रमित झालेल्या लोकांची संख्या देशभरात ९० इतकी आहे. केंद्रीय आरोग्य मंत्रालयाने याबाबत गांभीर्याने विचार सुरु केला आहे.

देशभातल्या अनेक राज्यांमध्ये या विषाणूचे रुग्ण आढळून येऊ लागले आहेत. विशेषतः दिल्ली, राजस्थान, हरियाणा आणि उत्तर प्रदेशातल्या काही भागांमध्ये रुग्ण वाढू लागले आहेत. कर्नाटकमध्येदेखील रुग्णसंख्या वाढत आहे. कर्नाटकसह हरियाणा मध्ये दोघांचा मृत्यू झाला आहे.

इंडियन काऊंसिल ऑफ मेडिकल रिसर्च अर्थात आयसीएमआरने नियमितपणे हात धुणे, मास्क लावणे आणि स्वच्छतेसंदर्भात आवाहन केलं आहे. या विषाणूच्या संभाव्य धोक्याचा विचार करुन बाधित राज्य आणि केंद्र अलर्ट मोडवर आले आहेत.

कर्नाटकातील हसन जिल्ह्यात या विषाणूमुळं एका 82 वर्षीय व्यक्तीचा मृत्यू झाला आहे. आरोग्य मंत्रालयाच्या अधिकाऱ्यांनी दिलेल्या माहितीनुसार, 1 मार्चला वृद्धाचा मृत्यू झाला. राज्य सरकारच्या अधिकाऱ्यांनी सांगितलं की, वृद्धाला ताप, घसादुखी, अंगदुखी अशा समस्या होत्या. आजारपणामुळं त्यांना 24 फेब्रुवारीला हसन इन्स्टिट्यूट ऑफ मेडिकल सायन्समध्ये दाखल करण्यात आलं. मात्र, तिथं त्यांचं 1 मार्चला निधन झालं.