भोपाळ - नॅशनल हेराल्ड प्रकरणात गांधी कुटुंबाने एकही पैसा घेतला नाही, असा दावा काँग्रेसचे ज्येष्ठ नेते तसेच मध्य प्रदेशचे माजी मुख्यमंत्री दिग्विजय सिंह यांनी केला. राहुल गांधी सोमवारी सक्तवसुली संचालनालयासमोर हजर राहण्याची अपेक्षा आहे. त्या पार्श्वभूमीवर दिग्विजय यांनी रविवारी पत्रकार परिषद घेतली.

भाजप खासदार सुब्रह्मण्यम स्वामी यांनी गांधी कुटुंबावर केलेले आरोप चुकीचे आहेत, असा दावा त्यांनी केला. याप्रकरणी स्वामी न्यायालयात गेले होते, मात्र तेव्हा ते सुनावणीसाठी का उपस्थित राहायचे नाहीत, असा सवाल त्यांनी उपस्थित केला. त्यांनी केंद्र सरकारवरही टीका केली. हे सरकार सुडाच्या भावनेने पेटून उठले आहे आणि त्याच हेतून काम करीत आहे, असा आरोप त्यांनी केला. कायद्याचे उल्लंघन झाले असेल तर मग आजपर्यंत प्राथमिक चौकशी अहवाल का सादर करण्यात आलेला नाही, असा सवालही त्यांनी उपस्थित केला. काँग्रेस पक्ष अशा प्रकरणांमुळे डगमगून जाणार नाही, असेही दिग्विजय यांनी नमूद केले.

राजकीय पक्षांच्या खर्चावर मर्यादा घालणारा कोणताही कायदा नाही असे निवडणूक आयोगानेही स्पष्ट केले आहे. जेव्हा काळा पैसा नियमित केला जातो तेव्हाच मनी लाँडरिंगचा गुन्हा दाखल केला जातो. या प्रकरणात असे काही झालेले नाही, उलटपक्षी नॅशनल हेराल्डला देणी चुकविण्यासाठी काँग्रेसने रक्कम दिली होती, याचा पूर्ण हिशेब असून त्याचे लेखापरिक्षणही झाले आहे.

- दिग्विजय सिंह, काँग्रेस नेते