देशात दिवसेंदिवस कोरोना महामारीचा प्रादुर्भाव आधिकच वाढत आहे. मागील तीन दिवसांपासून तर नवीन कोरोनाबाधित रुग्णांची संख्या दोन लाखांपेक्षा जास्त आढळत आहे. इतकेच नव्हे तर 15 दिवसांत कोरोनामुळे मृत्यू होणाऱ्यांचीही संख्या तिपटीनं वाढली आहे. देशात काही ठिकाणी कोरोनाची परिस्थिती हाताबाहेर गेली आहे. त्यामुळे स्मशानात मृतदेहांवर अंतिमसंस्कार करण्यासाठी वाट पाहावी लागतेय. यावरुनच काँग्रेसचे खासदार आणि नेते राहुल गांधी यांनी पंतप्रधान नरेंद्र मोदी यांच्यावर टीकस्त्र सोडलं आहे. राहुल गांधी यांनी ट्विट करत मोदी सरकारवर टीका केली आहे.

राहुल गांधी यांचं ट्विट -

'स्मशान आणि कब्रस्तान दोन्ही... जे म्हटलं ते करुन दाखवलं', असं ट्वीट राहुल गांधी यांनी केलं आहे. त्याचबरोबर #ModiMadeDisaster हा हॅशटॅगही वापरला आहे. या ट्वीटनंतर दोन्ही पक्षांचे कार्यकर्ते कमेंट्समध्ये एकमेकांवर टीका करताना दिसतायेत.

ट्विट करत प्रियंका गांधी यांनीही सुनावलं-

'थक्क करणारी गोष्ट म्हणजे, भारतात करोना संक्रमणाचा प्रभाव वाढत असताना, गेल्या ७० वर्षांतील सरकारची मेहनत पाण्यात घालत एकेकाळचा लस 'निर्यातक' देश आता लसीची आयात करणारा देश बनला आहे. नरेंद्र मोदी हे असे पाटलट आहेत ज्यांनी आपात्कालीन परिस्थितीतून सहजगत्या बाहेर पडण्यासाठी केवळ बोर्डिंग पासवर आपला फोटो लावलाय.'

भारतामध्ये दिवसागणिक कोरोनाबाधित रुग्णांची संख्या वाढतच चालली आहे. मागील तीन दिवसांपासून देशात दोन लाखांपेक्षा जास्त कोरोनाबाधित रुग्ण आढळत आहेत. मागील 24 तासांत 2 लाख 34 हजार 692 करोनाबाधित रुग्ण आढळले आहेत तर 1 हजार 341 रुग्णांनी आपले प्राण गमावले आहेत.