नवी दिल्लीः काँग्रेसचे खासदार शशी थरूर यांनी व्हॅलेंटाइन डे वर ट्विट केल्यानंतर केंद्रीय मंत्री मुख्तार अब्बास नक्वी यांनी प्रत्युत्तर देताना शशी थरूर तर लव्ह गुरू आहेत, त्यामुळे ते विरोधकांवर चिडणारच असे म्हटले आहे.

शशी थरूर यांनी ट्विटवर म्हटले आहे की, 'व्हॅलेंटाइन डे निमित्त शुभेच्छा देताना जर संघ परिवाराने तुम्हाला ट्रोल केले किंवा मित्र- मैत्रिणीसोबत बाहेर फिरु नका अशी धमकी दिल्यास त्यांना सांगा तुम्ही भारताचा पारंपारिक कामदेव दिवस साजरा करीत आहात.' असे ट्विट शशी थरुर यांनी केले आहे. त्यांच्या या ट्विटवरुन नक्वी यांनी प्रतिक्रिया दिली आहे.

थरूर यांच्या ट्विटला प्रत्युत्तर देताना मुख्तार अब्बास नक्वी यांनी म्हटले आहे की, 'शशी थरूर यांनी केलेली टीका आम्ही समजू शकतो कारण ते स्वतः लव्ह गुरु आहेत. त्यामुळे आता जर कोणी व्हॅलेंटाईन डे ला विरोध केला तर लव्ह गुरु तर त्याचा विरोध करणारच ना.'

दरम्यान, 14 फेब्रुवारी हा दिवस व्हॅलेंटाईन डे अर्थात प्रेम दिवस म्हणून जगभरात साजरा केला जात आहे. मात्र, हा पाश्चिमात्य संस्कृतीचा सण असल्याचे सांगत त्याला भारतातील काही कडव्या हिंदूत्ववादी संघटनांनी विरोध करीत आहेत. विरोध करताना यामुळे भारतीय संस्कृती बिघडत असल्याचा दावा त्यांच्याकडून केला जातो.