श्रीनगर : जम्मू काश्मीरमधील (Jammu Kashmir) एका व्यवसायिक ईमारतीला भीषण आग लागल्याची घटना घडली आहे. ही घटना श्रीनगर जिल्ह्यातील राजबाग येथे घडली असून गुरुवारी सकाळी आग लागली असल्याचं समोर आलं आहे. या घटनेत मोठे आर्थिक नुकसान झाल्याचं समोर आलं आहे.

सकाळी साधारण साडेअकरा वाजता ही घटना घडली आहे. या व्यवसायिक ईमारतीला आग लागल्यानंतर घटनास्थळी अग्निशामक दलाचे जवान दाखल झाले. आग एवढी भीषण होती की धुराच्या लोटांनी आकाश व्यापून टाकलं होतं. त्यानंतर त्यांनी ईमारतीत अडकलेल्या लोकांना बाहेर काढल्याचं अग्निशामक दलाच्या अधिकाऱ्यांनी सांगितले.

सध्या ही आग नियंत्रणात असून या घटनेत कोणतीही जिवितहानी झाली नसल्याचं अधिकाऱ्यांनी सांगितलं. दरम्यान या कारवाईत अग्निशामक दलाचा एक जवान जखमी झाला असून पुढील उपचारासाठी त्याला हॉस्पिटलमध्ये दाखल केले आहे असं अधिकाऱ्यांनी सांगितलं आहे. तसेच सदर घटनेचा पुढील तपास सुरु आहे.