नवी दिल्ली : दिवंगत भारतीय अंतराळवीर कल्पना चावला हिच्या पावलावर पाऊल ठेवत आंध्रप्रदेशची सिरीशा बांदला ही दुसरी महिला अंतराळवीर ११ जुलै रोजी अवकाशात भरारी घेईल. व्हर्जिन गॅलेक्टिकचे ‘व्हीएसएस युनिटी’ हे यान अंतराळवीरांना घेऊन न्यू मेक्सिको येथून अवकाशात झेपावणार आहे. या मोहिमेचे संस्थापक रिचर्ड ब्रॅन्सन हे देखील या मोहिमेत सहभागी होणार असल्याची माहिती सूत्रांनी दिली.

कोण आहे सिरीशा बांदला?

सिरीशाने परड्यू विद्यापीठातून ॲरोनॉटिकल इंजिनिअरिंगचे उच्च शिक्षण घेतले असून तिने २०१५ मध्येच व्हर्जिन गॅलेक्टिक या कंपनीमध्ये प्रवेश केला होता. ती अवघ्या ३४ वर्षांची आहे. याच कंपनीमध्ये सरकार व्यवहारविषयक समितीची ती उपाध्यक्ष देखील आहे. जॉर्जटाउन विद्यापीठातून तिने एमबीएची पदवी मिळवली होती. ब्रॅन्सन आणि बांदला यांच्यासोबत कंपनीचे मुख्य अंतराळवीर मार्गदर्शक बेथ मोजेस आणि अभियंते कॉलिन बेनेट हे देखील या मोहिमेत सहभागी होतील. दावे मॅक्के आणि मायकेल मासुक्की हे या यानाचे पायलट असतील.

आंध्रप्रदेशात मूळ

सिरीशा बांदलाचा जन्म आंध्रप्रदेशातील गुंटूर येथे झाला होता. पुढे तिचे सगळे बालपण टेक्सासमधील ह्युस्टन शहरामध्ये गेले. आता कल्पना चावलानंतर अंतराळात भरारी घेणारी ती दुसरी भारतात जन्मलेली महिला अंतराळवीर ठरणार असून अवकाशात जाणारी ती चौथी भारतीय व्यक्ती ठरेल. याआधी राकेश शर्मा, कल्पना चावला आणि सुनीता विल्यम्स यांनी अवकाशात भरारी घेतली होती.