गेल्या काही दिवसांमध्ये महिलांवर होणाऱ्या अत्याचाराच्या घटनांमध्ये मोठी वाढ झाल्याचे दिसून येत आहे. अशातच एक धक्कादायक माहिती समोर आली आहे. गुरुग्रामला लागून असलेल्या सोहना इथे ही घटना घडली आहे. जीवे मारण्याची धमकी देत, एका १४ वर्षीय मुलीचं अपहरण करून तिच्यावर लैंगिक अत्याचार करण्यात आल्याचा प्रकार समोर आला आहे. सर्व आरोपी सध्या फरार आहेत. आरोपींनी ओळखू येऊ नये म्हणून आपले तोंड बांधले होते.

पोलिसांनी कलम ३६३ आणि पॉस्को अंतर्गत गुन्हा आला आहे. सध्या पिडीत मुलीची वैद्यकीय तपासणी केली जात आहे. आरोपी हे मुलीचे नात्याने भाऊ लागतात, अशी प्राथमिक माहिती आहे.

मिळालेल्या माहितीनुसार, 14 वर्षीय अल्पवयीन मुलीच्या घरातील इतर सदस्य बाहेरगावी गेले होते. पिडीता लहान भावंडांसोबत घरी एकटीच होती. दरम्यान, अल्पवयीन मुलगी घरातून बेपत्ता असल्याचे लक्षात येताच पिडीतेच्या काकाने शोधाशोध सुरू केली.

काही वेळातच घरासमोर बांधकाम सुरू असलेल्या घराचे गेट उघडे असल्याचे त्यांना दिसले. तिथून काही मुलं धावत बाहेर आली. त्याचवेळी त्यांच्या पिडीत मुलगीही रडत घराबाहेर आली. काकांनी विचारल्यानंतर पिडीत मुलीने सांगितले की, पाच तरुणांनी तिला जबरदस्तीने घरातून उचलून, समोरील घरात नेले आणि तिच्यावर बलात्कार केला. मुलीने ओरडण्यास सुरुवात केल्यावर आरोपीने तिच्या तोंडाला कापड बांधले.

या घटनेनंतर पीडितेला सोहना येथील शासकीय रुग्णालयात दाखल करण्यात आले. डॉक्टरांनी तिची तपासणी केली. घटनेची माहिती मिळताच पोलिसांनी रुग्णालयात धाव घेतली आणि हॉस्पिटलमध्ये पोहोचून प्रकरणाचा तपास सुरू केला. डीसीपी दक्षिण सिद्धांत जैन यांनी सांगितले की, सामूहिक बलात्काराच्या कलमांतर्गत गुन्हा दाखल करण्यात आला असून तपास सुरू करण्यात आला आहे. लवकरच आरोपींनाही अटक करण्यात येईल.