पणजी : भाजप नेत्या आणि अभिनेत्री सोनाली फोगाट हिची गोव्यात हत्या करण्यात आल्याचं समोर आलं असून यासंदर्भात आरोपी सुधीर संगवान याने मोठा खुलासा केला आहे. गोव्यातील एका हॉटेलमध्ये तिचा मृत्यू झाल्याचं समोर आलं होतं. त्यानंतर तिच्यासोबत असलेल्या संगवान याला गोवा पोलिसांकडून अटक करण्यात आली होती.

(Sonali Phogat Murder Case Latest Updates)

सोनाली फोगाट हिच्या हत्येची कबुली आरोपी सुधीर सांगवान याने दिली असून तिच्या हत्येचा कट आधीच रचला असल्याचं त्याने चौकशीदरम्यान सांगितलं आहे. सोनालीला शुटींग असल्याचं खोटं सांगत गोव्याला घेऊन आले आणि तिची हत्या करण्यात आल्याची माहिती गोवा पोलिसांनी दिली आहे.

दरम्यान, सोनाली फोगाट यांचे काही फुटेज गोवा पोलिसांच्या हाती लागले होते. यावेळी त्यांनी ड्रग्जच्या ओव्हरडोसमुळे सोनाली यांची प्रकृती बिघडली आणि त्यांचा मृत्यू झाला असं सांगितलं होतं. त्यानंतर, आता सीसीटीव्हीचे काही फुटेज समोर आले होते. त्यामध्ये त्यांना जबरदस्तीने मद्यपान देण्यात येत असल्याचा तर्क लावण्यात येत आहे.

पोलिसांनी दिलेल्या निवेदनात म्हटले होते की, तपास अधिकाऱ्याने संबंधित आवारातील सीसीटीव्ही रेकॉर्डिंग तपासले आणि असे आढळून आले की, सुधीर सोनालीला पाण्याची बाटली पिण्यास भाग पाडत होता. या सर्व प्रकारानंतर सुधीर संगवान या आरोपीने चौकशीत हत्या केल्याची कबुली दिली आहे. त्याचबरोबर या हत्येचा कट खूप दिवसांपूर्वी रचला होता असं आरोपींनी गोवा पोलिसांना चौकशीदरम्यान सांगितलं आहे.