लखनौ : काँग्रेसने (Congress) उत्तर प्रदेशातील बरेली (Bareilly Uttar Pradesh) येथे ‘महिला मॅरेथॉन’ आयोजित केले होते. यामध्ये चेंगराचेंगरीसारखी परिस्थिती निर्माण झाल्याचे पाहायला मिळाले. या घटनेचे व्हिडिओ समोर आले आहेत. कोरोनाच्या काळात इतकी गर्दी जमवल्याने काँग्रेसवर टीका देखील केली जात आहे.

मंगळवारी उत्तर प्रदेशातील बरेली येथे काँग्रेस पक्षाने आयोजित केलेल्या ‘महिला मॅरेथॉन’मध्ये चेंगराचेंगरीसारखी परिस्थिती निर्माण झाली होती. पक्षाने उत्तर प्रदेश निवडणुकीसाठी 'लडकी हूं, लढ सकती हूं' या अंतर्गत प्रचार केला. याबाबत काँग्रेसच्या नेत्या प्रियंका गांधी वाड्रा यांनी स्वतः घोषणा केली होती. त्याचनिमित्त हे मॅरेथॉन आयोजित करण्यात आले होते. त्यामध्ये शेकडो मुली धावताना दिसत आहे. मध्येच चेंगराचेंगरीसारखी परिस्थिती निर्माण झाल्याने विद्यार्थिनी खाली पडलेल्या दिसतात. तसेच ओमिक्रॉनमुळे कोरोनाची रुग्णसंख्या वाढत आहे. तरीही यामध्ये अनेकांच्या तोंडाला मास्क दिसले नाही.

''हा तर...'' -

या कार्यक्रमाचे आयोजन करणार्‍या काँग्रेस नेत्या आणि बरेलीच्या माजी महापौर सुप्रिया आरोन यांनी सांगितले की काळजी करण्यासारखे काही नाही. "हजारो लोकांचा जमाव वैष्णोदेवीलाही गेला होता. त्याचे काय? बघा, ही खूप साहजिक गोष्ट आहे. हा मानवी स्वभाव आहे. या शाळकरी मुली आहेत. त्यांना रॅलीमध्ये थोडा वेळ धावायचे होते. पण, कोणाला काही दुखापत झाली असेल तर मी काँग्रेसच्या वतीने माफी मागतो, असे सुप्रिया आरोन म्हणाल्या

कोरोना नियमांचे पालन करून निवडणुका घ्यायच्या आहेत. तसेच राजकीय पक्षाने देखील प्रचार करताना कोरोना नियमांचे पालन करावे, असे बजावले आहे. पण, कोरोनाचे रुग्ण झपाट्याने वाढत असताना राजकीय पक्ष लाखोंची गर्दी करत रॅली काढताना दिसत आहेत. काँग्रेस आणि भाजप दोन्ही पक्षाकडून उत्तर प्रदेश निवडणुकीसाठी जोरदार प्रचार केला जात आहे.