म्हापसा (गोवा): संशयित सूचना सेठ व तिचा पती व्यंकटरमण यांच्या नात्यात दुरावा निर्माण झाल्याने हे प्रकरण न्यायालयात गेले होते. दोघांच्या घटस्फोटासाठी बंगळूरमध्ये सुनावणी सुरू होती. याव्यतिरिक्त चिन्मयच्या कस्टडीसाठी दोघांमध्ये न्यायालयीन लढाई सुरू होती. अशातच, बंगळूरच्या कुटुंब न्यायालयाने व्यंकटरमण यांना चिन्मयला भेटण्यासाठी परवानगी दिली होती आणि कदाचित हाच मुद्दा सूचनाला खटकला असावा आणि तिने चिन्मयची हत्या केली असावी, अशी शक्यता व्यकंटरमण यांच्या बाजूने वकील अ‍ॅड. अझर मीर यांनी शनिवारी माध्यमांसमोर व्यक्त केली.

अ‍ॅड. अझर मीर पुढे म्हणाले की, सूचना यांना राग होताच, तर तो त्यांनी व्यंकटारमण यांच्यावर काढायचा होता. चिन्मयचा जीव घेऊन कुणाचे बरे झाले! राहिला प्रश्न, न्यायाची तर आम्हाला कुठल्याच न्यायाची अपेक्षा नाही. कारण, चिन्मय या जगात नाही. चिन्मयसाठी व्यंकटरमण यांनी स्वतःचा जीव दिला असता. राहिला प्रश्न सूचना हिला शिक्षा होऊ अथवा नाही... किंवा सूचना यांना पोलिस कोठडीतच ठेवल्यानेसुद्धा व्यंकटरमण यांना आता कोणताच फरक पडत नाही. कारण, व्यंकटरमण यांनी त्यांचे सर्वस्व असलेला चिन्मय गमावला असल्याचा दावा अ‍ॅड. मिर यांनी केला.

व्यकंटरमण हे सूचना सेठ यांचा छळ करायचे, अशा काही बातम्या समोर येताहेत, असे विचारले असता अ‍ॅड. अझर मिर म्हणाले की, या बातम्यांमध्ये तथ्य नाही, तसेच दोघांमध्ये नक्की काय चालले होते ते मला माहिती नाही. आणि असे काही असते तर सूचना यांनी चिन्मयला का ठार मारले? मुळात चिन्मय सूचना यांचा छळ करत होता का? राग काढायचा होता तर व्यकंटरमण यांच्यावर सूचना हिने काढायचा! त्या निष्पाप चिमुकल्याचा या साऱ्यात काय दोष होता, असे म्हणत अ‍ॅड. मीर यांनी व्यकंटरमण यांची बाजू मांडली.

मुळात चिन्मयचा खूनाचा आरोप असणारी व्यक्ती ही पोलिस कोठडीत आहे, तर दुसरी व्यक्ती (व्यंकटरमण) यांनी चिन्मयच्या पार्थिवावर अंत्यसंस्कार केले.

रिमांडसाठी बाल न्यायालयात हजेरी

येत्या सोमवारी (ता.१५) कळंगुट पोलिस सूचना हिला बाल न्यायालयात पुढील रिमांडसाठी हजर करतील. सूचना हिचा पोलिस रिमांड आज रविवारी (ता.१४) संपतो. तसेच, कळंगुट पोलिस व्यंकटरमण यांना सोमवारी गोमेकॉत डीएनए चाचणीसाठी नेणार असल्याची माहिती पोलिस सूत्रांनी दिली.