नवी दिल्ली : ‘‘जर तुम्ही रोज एक जनहित याचिका दाखल केली तर आम्हाला एक विशेष न्यायालय स्थापन करावे लागेल,’’ असे सर्वोच्च न्यायालयाने भाजप नेते व वकील अश्‍विनी उपाध्याय यांची देशभरातील शाळांमध्ये समान गणवेश सक्तीचा करावा, याबद्दलची याचिका गुरुवारी फेटाळली. उपाध्याय यांच्या मुलाने ही याचिका केली असून त्यावर तातडीने सुनावणी घेण्याची विनंती त्यांनी सर्वोच्च न्यायालयाला केली होती. हिजाबच्या याचिकेवर पुढील आठवड्यात सुनावणी होणार आहे. त्याच वेळी समान गणवेशावरही सुनावणी घ्यावी, अशी मागणी त्यांनी केली होती. सरन्यायाधीश एन.व्ही.रमणा यांनी आज ती फेटाळली.

‘‘मी तुम्हाला अनेकदा सांगितले आहे. तुम्ही रोज एक जनहित याचिका दाखल करायला लागला तर आम्हाला एक विशेष न्यायालय स्थापन करावे लागेल. तुम्ही किती वेळा याचिका दाखल करणार आहात?, तुम्ही रोज एक जनहित याचिका दाखल करीत आहात. हिजाबची याचिका खूप पूर्वीच दाखल झाली आहे. क्षमा करा,’’अशा शब्दात सरन्यायाधीशांनी उपाध्याय यांना खडसावले. सरन्यायाधीश रमणा म्हणाले, की प्रत्येक प्रकरणात तुम्ही जनहित याचिका दाखल करू शकत नाही. संसदेत कामकाज चालत नाही का?. उपाध्याय यांनी पूर्वी दाखल केलेल्या एका याचिकेवरही सरन्यायाधीशांनी अशा प्रकारचे विधान केले होते.