कोलकाता - शारदा चिटफंड घोटाळ्याच्या चौकशीसाठी कोलकाताचे पोलिस आयुक्त राजीव कुमार यांच्या घरावर छापा टाकण्यासाठी आलेल्या अधिकाऱ्यांना पोलिसांनी ताब्यात घेतल्याने बंगालमध्ये अभुतपूर्व परिस्थिती निर्माण झाली आहे. या प्रकारानंतर ममता बॅनर्जींनी केंद्र सरकार आणि सीबीआयविरोधात आंदोलनास सुरुवात केली. तर कारवाईस अटकाव झाल्यानंतर सीबीआयने सर्वोच्च न्यायालयात धाव घेण्याचा निर्णय घेतला आहे. सीबीआयच्या याचिकेवर सर्वोच्च न्यायालयात उद्या  सुनावणी होणार आहे. 

शारदा चिडफंड घोटाळ्याप्रकरणी कोलकात्याचे पोलीस आयुक्त रजीव कुमार हे सीबीआयला सहकार्य करीत नाहीत. त्यांना सहकार्याबाबत निर्देश देण्यात यावेत या मागणीसाठी सीबीआयने सुप्रीम कोर्टा याचिका दाखल केली आहे. अनेकदा समन्स बजावूनही राजीव कुमार यांनी सीबीआयला सहकार्य केले नाही, तसेच चिडफंड घोटाळ्यातील पुरावे ते नष्ट करु शकतात असा आरोप सीबीआयने याचिकेत केला आहे. त्यामुळे यावर आजच सुनावणी घेण्यात यावी असे सरकारी वकिलांनी कोर्टाला सांगितले.

मात्र, सरन्यायाधीश रंजन गोगोई यांनी आजच यावर तातडीने सुनावणी घेणे गरजेचे नसल्याचेही स्पष्ट केले. सीबीआयला आधी कोर्टात पुरावे सादर करावेत त्यानंतर याप्रकरणी सुनावणी घेण्यात येईल असे कोर्टाने म्हटले आहे. काँग्रेस नेते अभिषेक मनु सिंघवी याप्रकरणी पश्चिम बंगाल सरकारची बाजू सुप्रीम कोर्टात मांडत आहेत.