नवी दिल्ली - दिल्ली महिला आयोगाच्या अध्यक्षा स्वाती मालीवाल यांनी आपल्या वडिलांबाबत मोठा खुलासा केला आहे. स्वाती मालीवाल म्हणाल्या की, लहानपणी वडील मला मारायचे, त्यामुळे मी खूप घाबरायची आणि लाजायची.

एवढेच नाही तर दिल्ली महिला आयोगाच्या अध्यक्षा मालीवाल यांनी म्हटले की, माझे वडील माझ्यावर लैंगिक अत्याचार करायचे. ही माहिती समोर येताच सोशल मीडियावर हे प्रकरण चर्चेत येऊ लागले. त्यातच, आता त्यांचे जुने ट्विट व्हायरल होत आहे.

"मी लहान असताना माझे वडील माझ्यावर लैंगिक अत्याचार करायचे. ते मला खूप मारायचे. ते घरी आल्यावर मला भीती वाटायची आणि अनेकदा बेडखाली लपून बसायचे. त्यांचे हे वक्तव्य समोर आल्यानंतर लोक त्यांचे जुने ट्विट सोशल मीडियावर शेअर करत आहेत, ज्यात त्यांनी आपल्या सैन्यात असलेल्या वडिलांचा उल्लेख केला आहे.

व्हायरल होत असलेल्या जुन्या ट्विटमध्ये स्वाती मालीवाल यांनी लिहिले की, मी एका सैनिकाची मुलगी आहे, मी सैन्यात वाढले आहे. मी देशासाठी काम करायला आणि देशासाठी जीव द्यायला शिकले आहे, जगातील कोणतीही शक्ती मला घाबरवू शकत नाही.

आता हे ट्विट शेअर करत एका युजरने लिहिले की, मग हा बाप कोण होता ज्याचा तुम्हाला २०१६ पर्यंत अभिमान होता? कोणतीही मुलगी तिच्या वडिलांबद्दल खोटे बोलत नाही यावर माझा ठाम विश्वास आहे. मग ते खोटे काय? आजचे की 2016चे? उत्तर द्यावे लागेल, कारण तुम्ही जगातील सर्वात पवित्र नात्यावर आरोप केले आहेत.

अंबुज भारद्वाज नावाच्या युजरने लिहिले की, स्वाती यांना कालपर्यंत फौजी वडिलांची मुलगी असल्याचा अभिमान होता. आज त्याच वडिलांच्या सन्मानाचा प्रसिद्धीसाठी खुलेआम लिलाव झाला.

भाजप नेते हरीश खुराना म्हणाले की, 'आप'च्या लोकांच्या डीएनएमध्ये खोटे बोलून सहानुभूती मिळवण्याचा हा प्रयत्न आहे. आज पुन्हा एकदा स्वाती मालीवाल यांनी हे सिद्ध केले. स्वातीचं आजचं वक्तव्य स्वीकारावं की २०१६ मध्ये तिचं ट्विट स्वीकारावं हे मला कळत नाही.