आम आदमी पक्षाच्या (आप) राज्यसभा खासदार स्वाती मालीवाल यांच्या मारहाण प्रकरणासंबधीचा १३ मे रोजी घडलेल्या घटनेचा पहिला व्हिडिओ समोर आला आहे. यामध्ये मुख्यमंत्री अरविंद केजरीवाल यांचे पीए असलेले बिभव कुमार वेगळे उभे असल्याचे दिसत आहेत. सुरक्षा कर्मचारी स्वाती मालीवाल यांच्याशी बोलत आहेत. यादरम्यान स्वाती मालीवाल सगळ्यांना धडा शिकवेन असं म्हणताना आणि बिभव कुमार यांना अपशब्द बोलताना दिसत आहेत.

स्वाती मालीवाल, मी पोलिसांना फोन केला आहे. पोलिसांना येऊ द्या. 'सकाळ'या व्हिडिओची पुष्टी करत नाही. दिल्ली पोलिसांनी या व्हिडिओची दखल घेतली आहे.

व्हिडिओवर काय म्हणाल्या स्वाती मालीवाल?

हा व्हिडिओ समोर आल्यानंतर स्वाती मालीवाल यांनी एक्स पोस्ट करत प्रतिक्रिया दिली आहे. त्या म्हणाल्या की, दरवेळेप्रमाणेच यावेळीही या राजकीय हिटमॅनने स्वत:ला वाचवण्याचा प्रयत्न सुरू केला आहे.

पुढे त्या म्हणाला, "आपल्या लोकांना ट्विट करायला लावून, आणि कोणत्याही संदर्भाशिवाय व्हिडिओ लावून, तो हा गुन्हा करून स्वतःला वाचवेल असे वाटते. कोणी कोणाला मारहाण करताना व्हिडिओ बनवतो का? घरातील आणि खोलीतील सीसीटीव्ही फुटेज तपासल्यानंतर सत्य सर्वांसमोर येईल. देव सगळं पाहतोय. एक न एक दिवस जे खरं आहे ते जगासमोर येईल.

13 मे रोजी घडली ही घटना

13 मे रोजी स्वाती मालीवाल मुख्यमंत्री अरविंद केजरीवाल यांच्या निवासस्थानी पोहोचल्या होत्या. दरम्यान, स्वाती मालीवाल यांनी बिभव कुमार यांच्यावर प्राणघातक हल्ला केल्याचा आरोप करत पोलीस नियंत्रण कक्षाला (पीसीआर) फोन केला होता. मात्र, त्यांनी पोलिसांत तक्रार दिली नाही.

यानंतर पोलिसांनी स्वाती मालीवाल यांच्याशी संपर्क साधून तीन दिवसांनी गुरुवारी त्यांचा जबाब नोंदवला. यानंतर पोलिसांनी गंभीर कलमांखाली एफआयआर नोंदवला.