हिजाबवरून कर्नाटकातील कॉलेजमधून सुरू झालेला वाद आता आंतरराष्ट्रीय स्तरावरही चर्चेचा विषय बनला आहे. बांगलादेशी लेखिका तस्लिमा नसरीन यांनीही शैक्षणिक संस्थांमध्ये हिजाब घालण्यावर भाष्य केले आहे. हिजाब, बुरखा आणि निकाब हे अत्याचाराचे प्रतीक असल्याचे तस्लिमा नसरीन (Taslima Nasreen) म्हणाल्या.

इंडिया टुडे टीव्हीला दिलेल्या मुलाखतीत त्या बोलत होत्या. कर्नाटक उच्च न्यायालयात शैक्षणिक संस्थांमध्ये हिजाब (Hijab) बंदीविरोधातील याचिकेवर सुनावणी सुरू आहे. मला वाटते शिक्षणाचा अधिकारच धार्मिक स्वातंत्र्याचा अधिकार आहे. काही मुस्लिमांना वाटते की हिजाब खूप महत्त्वाचा आहे. काहींना वाटते की ती एक अनावश्यक गोष्ट आहे. परंतु, सातव्या शतकात स्त्रीविरोधी लोक हे हिजाब घेऊन आले. कारण, ते महिलांना लैंगिक वस्तूंपेक्षा अधिक काही मानत नव्हते, असेही तस्लिमा नसरीन (Taslima Nasreen) म्हणाल्या.

स्त्रीकडे तेव्हाच बघितले जाईल जेव्हा शारीरिक गरज वाटेल. म्हणूनच महिलांनी बुरखा आणि हिजाब घालावा. त्यांनी स्वतःला पुरुषांपासून लपवावे. आजच्या समाजात स्त्री-पुरुष समान आहेत हे आपण शिकलो आहोत. म्हणूनच हिजाब (Hijab) आणि निकाब हे महिलांवरील अत्याचाराचे लक्षण आहे, असेही तस्लिमा नसरीन (Taslima Nasreen) म्हणाल्या.

कर्नाटकातील (karnataka) हिजाब प्रकरणाची हायकोर्टात सुनावणी सुरू आहे. कालच्या सुनावणीत याचिकाकर्त्याच्या वकिलांनी बांगडी, बिंदी आणि पगडीबाबत युक्तिवाद केला. बांगड्या घालणाऱ्या हिंदू मुली, क्रॉस घातलेल्या ख्रिश्चन मुलींना शाळेतून हाकलले जात नाही, तर मुस्लिम मुलींना का हाकलले जाते, असे ते म्हणाले.