ऐन दिवाळीच्या सणात गोपालगंज आणि बेतियामध्ये बनावट दारू मुळे ३१ जणांचा मृत्यू झाला आहे. गोपालगंजमध्ये 20 जणांचा मृत्यू तर बेतियामध्ये आतापर्यंत 11 जणांचा मृत्यू झाला आहे. बनावट दारू पिल्याने अनेकांची दृष्टीही गेली आहे. याआधी गेल्या आठवड्यात मुझफ्फरपूरमध्येही मद्यपानामुळे ६ जणांना जीव गमवावा लागला होता. बिहारमधील विरोधी पक्षनेते तेजस्वी यादव यांनी दारूबंदीमुळे होणाऱ्या मृत्यूंसाठी नीतीश सरकारला जबाबदार धरले आहे. त्यांनी ट्विट करत हल्लाबोल केला आहे.

ते म्हणाले, बिहारमध्ये दिवाळीच्या दिवशी विषारी दारूमुळे 35 हून अधिक लोकांचा मृत्यू सरकारमुळे झाला आहे. कुणाच्या तरी लहरीपणामुळे बिहारमध्ये फक्त कागदोपत्रीच दारूबंदी आहे. येथे ब्लॅकमध्ये दारूविक्रिची लुटमार होत आहे.

नीतीश कुमार यांनी केले आवाहन

बिहारमध्ये विषारी दारूमुळे झालेल्या मृत्यूंबाबत मुख्यमंत्री नीतीश कुमार यांनी म्हटले आहे की, 2016 पासून आम्ही दारूबंदीची काटेकोरपणे अंमलबजावणी केली आहे. बरेच लोक दारूबंदीच्या बाजूने आहेत. मद्यपान करू नका असे आवाहनही केले आहे. काहीतरी चुकत असेल. काही लोकांमध्ये चुका करण्याची प्रवृत्ती असते.

लोक माझ्या विरोधात बोलतात

मुख्यमंत्री पुढे म्हणाले, 'गडबड करणाऱ्या ठराविक लोकांना शिक्षा होते. तुरुंगातही जावे लागते. लोकांना यापासून दूर राहावे असे मी आवाहन करतो. दारूबंदी विरोधात काही लोक माझ्या विरोधात बोलतात. याची मी काळजी करत नाही.

पोलीस कर्मचारी निलंबित

अवैध धंदे रोखण्यात हलगर्जीपणा केल्याप्रकरणी मोहम्मदपूर पोलीस ठाण्याचे एसएचओ आणि एका कर्मचाऱ्याला निलंबित करण्यात आले आहे. जिल्हा पोलिस अधीक्षक आनंद कुमार म्हणाले, ज्या अधिकारी आणि कर्मचाराच्या कार्यक्षेत्रातील तीन गावांमध्ये मोठ्या प्रमाणात मृत्यू झाला. अशा मोहम्मदपूर पोलिस स्टेशनचे एसएचओ आणि एका कर्मचाऱ्याला निलंबित केले आहे.