तेलंगणाचे गृहमंत्री मोहम्मद महमूद अली यांचा एक संतापजनक व्हिडिओ सध्या सोशल मीडियावर तुफान व्हायरल होत आहे. ज्यामध्ये ते आपल्या अंगरक्षकाला चापट मारताना दिसत आहेत. हा व्हिडिओ राज्य मंत्रिमंडळातील पशुसंवर्धन मंत्री टी श्रीनिवास यादव यांच्या वाढदिवसाच्या कार्यक्रमादरम्यानचा असल्याचे सांगण्यात येत आहे.

या व्हिडीओमध्ये कार्यक्रमात सहभागी झाल्यानंतर गृहमंत्री महमूद अली हे यादव यांना मिठी मारताना दिसत आहेत. यावेळी ते वाढदिवसाच्या शुभेच्छा देतात आणि त्यानंतर, ते पुष्पगुच्छ घेण्यासाठी त्याच्या अंगरक्षकाकडे वळले, परंतु त्याच्या हातात पुष्पगुच्छ नसल्यामुळे ते चिडले आणि लगेच त्याला चपराक लगावली.

वृत्तसंस्था पीटीआयने दिलेल्या वृत्तानुसार, हा व्हिडिओ शुक्रवार (६ ऑक्टोबर) चा आहे. टी श्रीनिवास यादव यांना वाढदिवसाच्या शुभेच्छा दिल्यानंतर, पुष्पगुच्छ वेळेवर न दिल्याबद्दल महमूद अलींने त्यांच्या गनरला चापट मारली, तेव्हा श्रीनिवास त्यांना शांत करताना दिसले. या संदर्भात गृहमंत्री मोहम्मद महमूद अली यांच्याशी प्रतिक्रिया जाणून घेण्याचा प्रयत्न करण्यात आला, मात्र चर्चा होऊ शकली नाही.