लखनौ - यूपीच्या इटावामधील एका लग्नात घडलेल्या प्रकाराने सर्वांनाच आश्चर्याचा धक्का बसला आहे. वधूला वराचा चेहरा आवडला नाही म्हणून तिने लग्नाला नकार दिला. विशेष म्हणजे नवरीने वरासोबत दोन फेरेही घेतले होते, मात्र नवरदेवाला पाहिल्यानंतर तिचा पारा चढला आणि तिने तिथून पळ कढला. (bride refuses to marry)

नवरीच्या ही कृती पाहून नवरदेवाकडची मंडळी थक्क झाली होती. लग्नापूर्वी ज्या मुलाचा फोटो दाखवला होता तो मुलगा तिथे नव्हता, असा आरोप वधूने केला आहे. तसेच नवरादेवाचं वय खूप जास्त असल्याचं वधूचं म्हणणं होतं. यावेळी सर्वांनी वधूची समजूत काढण्याचा प्रयत्न केला. परंतु वधुवर अखेरपर्यंत कोणाच्याही बोलण्याचा परिणाम झाला नाही. परिणामी, नवरदेवाला वधूशिवाय वऱ्हाड परत न्यावे लागले.

हे प्रकरण भरठाणा भागातील झिंदुआ गावातील आहे. नागलाबाग येथील रहिवासी असलेल्या मुलीचे लग्न समथर जाफरपूर येथील 30 वर्षीय मुलासोबत निश्चित झाले होते. बुधवारी लग्नाचं वऱ्हाड विवाहस्थळी वेळेत पोहोचलं होतं. त्यानंतर लग्नाच्या विधींना सुरुवात झाली होती. सात फेऱ्यांसाठी वधू-वर दोघेही मंडपात पोहोचले होते. फेऱ्यांना सुरुवात झाली, त्याचवेळी नवरीची नजर तिच्या भावी नवऱ्याच्या चेहऱ्यावर पडली. वराचा चेहरा पाहून वधूचा पारा चढला. दोन फेऱ्यांनंतर वधू मंडपातून बाहेर पडली आणि तिने लग्नाला नकार दिला.

लग्नाला नकार देण्याचा वधुचा निर्णय़ ऐकून वऱ्हाडींमध्ये एकच खळबळ उडाली होती. उपस्थितांनी वधूला लग्नास नकार देण्याचे कारण विचारले असता तिने सांगितले की, तिला लग्नापूर्वी दाखवलेला फोटो दुसऱ्या मुलाचा होता अन् लग्न दुसऱ्याशी केले जात आहे. वधूने सांगितले की, ज्या व्यक्तीशी तिचे लग्न होत आहे त्या व्यक्तीचे वय दुप्पट आहे. तसेच वराचा चेहराही काळा आहे. दरम्यान वधुच्या आई सांगितलं की, लग्नासाठी ज्या मुलाचा फोटो दाखविण्यात आला होता, तो मुलगा लग्नावेळी नव्हताच. त्यामुळे मुलीने लग्नास नकार दिला. तर दुसरीकडे नवरदेवाच्या घरच्यांनी पोलिसांत तक्रार दाखल केली आहे.