मुंबई: पेट्रोल-डिझेलच्या दरवाढीसंदर्भात शिवसेनेचे खासदार संजय राऊत यांनी मोदी सरकारवर टीका केली आहे. काल केंद्र सरकारने पेट्रोल आणि डिझेलचे दर क्रमश: पाच आणि दहा रुपयांनी कमी करुन जनतेला दिलासा देण्याचा प्रयत्न केला आहे. मात्र, पोटनिवडणुकीतल्या पराभवामुळे पेट्रोलचे दर कमी केल्याचा दावा संजय राऊत यांनी केला आहे. इंधन दरवाढीवरुन केंद्र सरकारला चिमटे काढत त्यांनी म्हटलंय की, पेट्रोलचे दर 50 रुपयांनी कमी करायचे असतील तर भाजपचा संपूर्ण पराभव करावा लागेल.

त्यांनी म्हटलंय की, 100 रुपये दर वाढवले आणि आता फक्त पाच रुपये कमी केले आहेत. खरं तर इंधनाच्या भाववाढीतून बेहिशेबी पैसे केंद्र सरकारने कमावले आहेत. करायचे होते तर केंद्राने 25 रुपये कमी करायला हवे होते. याचं कारण असं आहे की, केंद्र सरकारचं मोठं मन नाहीये. कुजकं आणि सडकं आहे, अशी टीका त्यांनी केली आहे.

संजय राऊत यांनी म्हटलंय की, केंद्र सरकारने लादलेली महागाई आहे ही, या महागाईशी कसा सामना करणार? काल पाच आणि दहा रुपये पेट्रोल-डिझेलचे भाव कमी केले. तेवढ्याने काय होणार? पोटनिवडणुका हरल्यानंतर जाग आली. या पराभवानंतर पाच रुपये कमी झाले. जर 50 रुपये कमी करायचे असतील तर आपल्याला संपूर्ण भाजपचा पराभव करावा लागेल. महागाईमुळे दिवाळीचं वातावरण नाहीये.

मोठं मन दाखवायला मन असावं लागतं. केंद्रानं किमान 25 रुपये कमी करायला हवे होते. 100 रुपये वाढवून 5 रुपये कमी करायचे, याला मोठं मन म्हणत नाहीत. लोकं पेट्रोल पंपावरती आता 15-20 रुपयाचे डिझेल टाकत आहेत.पेट्रोल डिझेलचे दर राज्य सरकार वाढवत नाहीत, ते केंद्र सरकार वाढवतं. त्यामुळे याबाबत बोट तुमच्याकडेच दाखवावं लागणार, असंही त्यांनी म्हटलंय.