खानापूर : खानापूर तालुक्यातील बिडीनजीक गोलिहळी येथे गावठाण जमिनीत असलेल्या जैन तीर्थंकर बाहुबलीची (Bahubali) पुरातन काळातील मूर्ती चोरीला गेल्याने खळबळ उडाली होती. या घटनेबाबत नंदगड पोलिस स्थानकात जमीन मालकाविरोधात तक्रार दाखल करून कारवाई करण्याची ग्रामस्थांनी मागणी केली आहे. दरम्यान, पोलिसांनी शोध घेऊन त्या मूर्ती घेऊन गेलेल्या व्यक्तींना ताब्यात घेतले आहे.

पण, मूर्तीच्या चोरी प्रकरणावरून गावात नाराजी निर्माण झाल्याने संपूर्ण गावाने सोमवारी दिवसभर नंदगड पोलिस ठाण्यात (Nandgad Police Station) ठाण मांडले होते. प्रकरणाची सखोल चौकशी करावी, अशी मागणी केली. या प्रकरणाबाबत पोलिसांनी दिलेली माहिती अशी की, बिडीजवळील गोलिहळी येथील शंकर गोळेकर व त्यांचे बंधू बसप्पा गोळेकर यांनी जमिनीवर प्लॉट पाडून ती विकण्याचा प्रयत्न केला. परंतु त्या ठिकाणी पूर्वीपासून काही जमिनीत स्मशानभूमी व काही जमिनीत पुरातन काळापासून बाहुबलीची मूर्ती असल्याने त्या जमिनीतील प्लॉट विक्री होत नव्हती.

त्या ठिकाणी असलेली पुरातन बाहुबलीची मूर्ती अज्ञात व्यक्ती एका गाडीतून घेऊन जाताना शाळकरी मुलांनी पाहिले होते. ते समजल्यावर ग्रामस्थांत एकच असंतोष निर्माण झाला. त्या मूर्ती घेऊन गेलेल्या वाहनाचा शोध घेऊन ग्रामस्थांनी पोलिस ठाणे गाठले. त्या वाहन चालकाच्या विरोधात पोलिसात तक्रार दाखल केली. संबधितावर ठोस कारवाई करण्यात यावी व मुर्तीची पुन्हा प्रतिष्ठापना करावी, अशी मागणी करत प्रमुख नागरिक शिवाजी ईश्वर गुरव, इराप्पा सात्ताणावर, महेश कुणकीकोप, उमेश पाटील, ज्ञानेश्वर पाटील, सोमवारी रात्री उशिरापर्यंत नंदगड पोलिस ठाण्यात ठाण मांडून बसले होते.