जयपूर : योगगुरू बाबा रामदेव (Yoga Guru Baba Ramdev) नेहमी आपल्या योगासनांमुळं किंवा पतंजली कंपनीबाबतच्या बातम्यांमुळं चर्चेत असतात. त्यासोबतच काही वेळा ते आपल्या वक्तव्यांमुळंही चर्चेचा विषय ठरतात. नुकतंच त्यांनी ठाण्यात महिलांबाबत केलेल्या वादग्रस्त वक्तव्यामुळं पुन्हा चर्चेच्या केंद्रस्थानी आले आहेत.

पतंजलीच्या मोफत योग शिबिरात बोलत असताना बाबा रामदेव म्हणाले, महिला साडीमध्ये छान दिसतात, सलवार-सुटमध्येही (पंबाजी ड्रेस) छान दिसतात. आणि माझ्या नजरेनं पाहिलं तर, काही घातलं नाही तरी छान दिसतात, असं त्यांनी वक्तव्य केलं होतं. आता योगगुरू बाबा रामदेव यांनी देशात लोकसंख्या नियंत्रण कायदा आणण्याची मागणी केलीय.

राजस्थानची राजधानी जयपूर इथं झालेल्या अभाविपच्या राष्ट्रीय अधिवेशनात (National Convention of ABVP) बाबा रामदेव यांनी ही मागणी केली. अखिल भारतीय विद्यार्थी परिषदेच्या 68 व्या राष्ट्रीय अधिवेशनाचं उद्घाटन करताना रामदेव म्हणाले, भारताला आर्थिक आणि आध्यात्मिकदृष्ट्या समृद्ध व्हायचं आहे. भारतात जन्माला येऊन काही लोक कम्युनिस्ट समाजवादाच्या बाता करतात. त्या कम्युनिस्टांनी चीन आणि उत्तर कोरियात जावं, असं त्यांनी सांगितलं.

लोकसंख्या नियंत्रण कायदा आणण्याची मागणी करताना बाबा रामदेव म्हणाले, भारतीय संस्कृतीत जातीच्या आधारावर कधीही भेदभाव केला गेला नाही. स्त्री-पुरुष असा भेदभाव कधीच नव्हता. कधीही मोठं होण्याचा विचार करू नका, तर मोठं करण्याचा विचार करा. अभाविपच्या कार्यकर्त्यांना यशाचा मंत्र देत ते म्हणाले, वेळेत काम करणं हे यशाचं सर्वात मोठं सूत्र आहे.

बाबा रामदेव पुढं म्हणाले, भविष्यात 5 लाख कोटींचं आर्थिक साम्राज्य उभं करायचं आहे. देवाच्या नियमांचं कधीही उल्लंघन करू नका. संविधानावर विश्वास असणं आवश्यक आहे. असं काम कधीही करू नका, त्यामुळं तुमची प्रतिमा खराब होईल. भारतानं संपूर्ण जगाचं नेतृत्व करावं, ही जबाबदारी घेण्याची क्षमता केवळ अभाविपमध्ये असल्याचं ते म्हणाले. आम्हा भारतीयांचे मर्यादा पुरुषोत्तम श्रीराम आणि श्रीकृष्ण यांच्याशी रक्ताचं नातं आहे. आम्ही ऋषी-मुनी, विद्वान आणि महान पराक्रमी लोकांची मुलं आहोत, असंही त्यांनी स्पष्ट केलं.