Global Family Day 2024 : दरवर्षी १ जानेवारीला संपूर्ण जग नववर्षाचा आनंद साजरा करताना दिसतं. सगळीकडे नवीन वर्षाचा उत्साह आपल्याला पहायला मिळतो. मात्र, तुम्हाला हे माहित आहे का? की दरवर्षी जगभरात १ जानेवारीला आंतरराष्ट्रीय स्तरावर ग्लोबल फॅमिली डे उत्साहात साजरा केला जातो.

संपूर्ण जगात शांतता स्थापित करणे आणि कुटुंबातील सदस्यांनी खेळीमेळीने एकत्र राहणे हा या दिनामागचा हेतू आहे. कुटुंब हा आपल्या जीवनाचा अविभाज्य आणि महत्वाचा भाग आहे. हे आपल्या सर्वांना माहित आहे. कुटुंब सोबत असेल तर आपण आयुष्यातील कोणत्याही संकटांना सहज तोंड देऊ शकतो.

आज या जागतिक कुटुंब दिनानिमित्त आपण कुटुंब सूखी राहण्यासाठी काही टिप्स जाणून घेणार आहोत. ज्या टिप्सच्या मदतीने तुम्ही कुटुंबातील सदस्यांना आनंदित ठेवून तुमची फॅमिली हॅपी ठेवू शकता. चला तर मग जाणून घेऊयात या टिप्स.

एकत्र जेवण करा

कुटुंबातील सदस्यांनी मिळून एकत्र जेवण करण्याचे अनेक फायदे आहेत, असे आज ही म्हटले जाते. कुटुंबातील सदस्यांनी एकत्रपणे जेवण केल्याने कुटुंबात आनंद वाढतो. जेवण करण्याच्या निमित्ताने कुटुंबातील सदस्यांचा एकमेकांसोबत संवाद होतो.

दिवसभरातील कोणत्याही एका वेळी सर्व सदस्यांनी मिळून एकत्रितपणे जेवण करायला हवे. एकत्र जेवण करताना कुटुंबातील सदस्यांनी एकमेकांना त्यांचा आजचा दिवस कसा गेला? आज दिवसभरात काय घडले? याची विचारपूस करावी.

कुटुंबात लहान मुले असतील तर मुलांना त्यांच्या अभ्यासाबद्दल किंवा दिवसाबद्दल विचारा. कौटुंबिक विषयांवर बोलून चर्चा करा. यामुळे, कुटुंबातील सदस्यांचा एकमेकांसोबत संवाद होतो आणि विचारपूस होते.

कौटुंबिक सहलीचे करा नियोजन

मित्र-मैत्रिणींसोबत फिरायला तर सर्वजण जातात. मात्र, कुटुंबासोबत प्रवास करण्याची मजा काही औरच असते. त्यामुळे, कौटुंबिक सहलीचे आवर्जून नियोजन करा. सर्वांच्या आवडीनिवडीनुसार ठिकाण ठरवा आणि फिरायला जा.

या सहलीच्या निमित्ताने सर्वजण एकत्र येतात, गप्पागोष्टी होतात. त्यामुळे, कुटुंबातील सदस्यांचा एकमेकांप्रती जिव्हाळा वाढण्यास मदत होते. या सहलीच्या निमित्ताने नवीन ठिकाणाची भटकंती होते आणि विविध खाद्यपदार्थांचा आस्वाद घेतला जातो. विशेष म्हणजे, या कौटुंबिक सहलीच्या निमित्ताने अनेक आठवणींची शिदोरी तुम्ही सोबत घेऊन जाता.

काहीतरी नवे शिकण्याचा प्रयत्न करा

आयुष्यात काहीतरी नवीन शिकणे हे खूप महत्वाचे आहे. या नव्या गोष्टींमुळे आपल्या ज्ञानात तर भर पडतेच शिवाय, नवीन अनुभव देखील मिळतो. कुटुंबातील सदस्यांनी देखील नवीन गोष्टी शिकणे फार गरजेचे आहे.

जेव्हा तुम्ही तुमच्या संपूर्ण कुटुंबासोबत काहीतरी नवीन शिकता तेव्हा त्याची उत्सुकता आणि आनंद काहीतरी औरच असतो. रेसिपी बनवणे, कलाकुसर बनवणे, चित्रकला शिकणे आणि एखादी नवीन भाषा शिकणे इत्यादी गोष्टी तुम्ही एकत्रितपणे शिकू शकता. या गोष्टींमुळे कुटुंब तर मजबूत होतेच शिवाय, कुटुंबातील सदस्यांना एकमेकांसोबत वेळ घालवण्याची संधी देखील मिळते.