Gujarat Assembly Election Result 2022: गुजरात निवडणुकीसाठी आज मतमोजणी सुरु आहे. सकाळी ८ वाजता मतमोजणीला सुरुवात झाली. अवघ्या तासाभरातच गुजरातचे कल स्पष्ट झालेले आहेत.

गुजरातमध्ये सध्या भाजप १३० पेक्षा अधिकच्या जागांवर आघाडीवर आहे. तर काँग्रेस ४४ जागांवर आघाडीवर आहे. मात्र आम आदमी पक्ष केवळ ४ जागांवर आघाडीवर आहेत. नुकतंच ईव्हीएम मशिनवरील मतमोजणी सुरु झालेली आहे. त्यामुळे जागांमध्ये फरक पडू शकतो. मात्र पहिले कल हाती आलेले असून 'आप' मागे पडलेलं आहे.

आम आदमी पक्षाने यावेळी गुजरामध्ये ताकद लावली होती. दिल्ली आणि पंजाबमधील त्यांचे मंत्री गुजरातमध्ये ठाण मांडून होते. पक्षाच्या दिग्गज नेत्यांनी गुजरातचे अनेक दौरेही केले. मात्र म्हणावं तस यश सध्या दिसून येत नाहीये.

गुजरातेतल्या विधानसभेच्या १८२ जागांमध्ये बहुमतासाठी ९२ जागांची गरज असते. २०१७मध्ये भाजपने ९९ जागांवर विजय मिळवला होता. तर काँग्रेसने ७७ जागांवर. ६ जागांवर अपक्षांनी बाजी मारलेली.

मध्य गुजरातमध्ये ६८ जागा आहेत. सौराष्ट्र आणि कच्छमध्ये ५४, उत्तर गुजरातमध्ये ३२ आणि दक्षिण गुजरातमध्ये २८ विधानसभा मतदारसंघ आहेत.