नीमच (मध्यप्रदेश) : मध्य प्रदेशच्या नीमच जिल्ह्यात क्रौर्याची परिसीमा गाठली. दोन दिवसांपूर्वी सिंगोली जिल्ह्यातील पोलिस ठाण्याच्या हद्दीतील कला येथे किरकोळ अपघातामुळे एका जमावाने आदिवासी युवकाला बेदम मारहाण केली आणि नंतर त्याला वाहनाला बांधून फरफटत नेल्याचा धक्कादायक प्रकार घडला. त्याला दवाखान्यात नेले असता त्याचा मृत्यू झाला. याप्रकरणी गुन्हा दाखला झाला असून आरोपी फरार आहेत.

कान्हा ऊर्फ कन्हैयालाल भी (वय ३५) असे मृत आदिवासी युवकाचे नाव आहे. बाणदा या आपल्या गावातून तो एका साथीदारासह नीमच सिंगोली मार्गावरून कला येथे जात होता. यादरम्यान एका व्यक्तीची दुचाकी त्याला धडकली. या अपघाताने वाद निर्माण झाला. त्यानंतर संबंधित व्यक्तीने नातेवाइकांना बोलावले आणि त्यांनी एकत्र येऊन आदिवासी युवकाला बेदम मारहाण केली. त्याला एका टेम्पोला बांधले आणि फरफटत नेले. यामुळे तो गंभीर जखमी झाला. त्याला दवाखान्यात नेले असता दुसऱ्या दिवशी शुक्रवारी त्याचा मृत्यू झाला.

यासंदर्भात नीमचे पोलीस अधीक्षक सूरजकुमार वर्मा म्हणाले, "गुरुवारी सकाळी सहाच्या सुमारास आरोपी छीतरमल गुर्जर याच्या मोटारसायकलने कान्हाला धडक दिली. यादरम्यान छीतरमल याच्या गाडीला असलेली दुधाची कॅन खाली पडली. यावेळी कान्हाने दगड उचलला. यामुळे छीतरमलने नातेवाइकांना बोलावले आणि कान्हाला बेदम मारहाण केली. यावेळी एक पिकअप गाडी जात होती. आरोपींनी कान्हाचे हातपाय बांधले आणि त्याला शंभर मीटरपर्यंत ओढत नेले. यामध्ये तो गंभीर जखमी झाला"

अमानुष घटनेचा व्हिडिओ व्हायरल

दरम्यान, या घटनेचा व्हिडिओ व्हायरल झाल्याने पोलीस घटनास्थळी पोचले. परंतू तोपर्यंत आरोपी फरार झाले. पाचही आरोपींची ओळख पटली आहे. या घटनेत मोटारसायकल, दोन चारचाकी वाहने आणि पिकअप व्हॅन आणि नायलॉन दोरी पोलिसांनी जप्त केली आहे. कॉंग्रेसचे प्रदेशाध्यक्ष कमलनाथ यांनी या प्रकाराचा निषेध केला आहे.