नवी दिल्ली - ट्विटरवर भारताचा चुकीचा नकाशा दाखवल्याप्रकरणी युपी पोलिसांनी गुन्हा दाखल केला आहे. यामध्ये ट्विटर इंडियाचे प्रमुख मनीष माहेश्वरी यांचेही नाव आहे. बंजरंग दलाच्यावतीने याबाबत तक्रार दाखल करण्यात आली होती. महिन्याभरात उत्तर प्रदेशात मनीष माहेश्वरी यांच्या विरोधातील ही दुसरी तक्रार आहे. ट्विटरने भारताचा चुकीचा नकाशा हटवला आहे. याआधी ट्विटरकडून जम्मू काश्मीर आणि लडाखला वेगवेगळे देश असल्याचं दाखवण्यात आलं होतं. ट्विटरच्या ट्विप लाईफ सेक्शनमध्ये ही चुकीची माहिती देण्यात आली होती. त्यानंतर सोशल मीडियावरून संताप व्यक्त केला जात होता. तसंच ट्विटरविरोधात कारवाईची मागणीसुद्धा केली गेली.

ट्विटरने पुन्हा एकदा खोडसाळपणा करत काश्‍मीर आणि लडाखचा चुकीचा नकाशा प्रसिद्ध करून नव्या वादाला तोंड फोडले होते. या मुद्यावरून संतप्त भारतीय युजरकडून कारवाईची जोरदार मागणी झाल्यानंतर ट्विटरने चुकीचा नकाशा हटवित सपशेल माघार घेतली.

देशाचा चुकीचा नकाशा दाखविणे हा गंभीर गुन्हा असल्याने सरकारने ट्विटरवर कठोर कारवाईचा इशारा दिला आहे. ट्विटरने याआधी देखील अशी खोड काढत भारताच्या नकाशामध्ये हेराफेरी केली होती. आज दुहेरी कुरापत काढताना ट्विटरने जम्मू-काश्मीर आणि लडाख हे भाग भारताच्या नकाशाबाहेर दाखविले होते तसेच निवासी तक्रार निवारण अधिकारीपदी परकी अधिकाऱ्याची नियुक्ती केली होती. ट्विटरच्या ट्विट लाइफ विभागातील नकाशात हेतुपुरस्सर फेरफार करण्यात आल्याचे एका युजरने निदर्शनास आणून दिल्यानंतर त्यावर संतप्त प्रतिक्रिया उमटल्या होत्या.