नवी दिल्ली : मायक्रोब्लॉगिंग साइट ट्विटरने देशाचे उपराष्ट्रपती व्यंकय्या नायडू यांचे ट्विटर अकाउंट काही तासांसाठी अनव्हेरिफाइड केलं होतं. उपराष्ट्रपतींच्या ट्विटर अकाउंटची ब्लू टिक हटवण्यात आली होती. उपराष्ट्रपतींच्या ट्विटरची ब्लू टिक हटवल्याचं निदर्शनास आल्यानंतर अनेकांनी राग व्यक्त केला होता. सरकारनेही याबाबत ट्विटरवर नाराजी व्यक्त केली होती. फक्त व्यंकय्या नायडू नव्हे तर राष्ट्रीय स्वयंसेवक संघाशी संबंधीत अनेकांच्या ट्विटर हँडल समोरचे ब्लू टीक हटवण्यात आले होते. मात्र आता हे ब्लू टीक पुन्हा देण्यात आलं आहे.

ट्विटर इंडिया आणि भारत सरकार यांच्यामध्ये गेल्या काही दिवसांपासूनच वाद सुरु आहे. सरकारने लागू केलेल्या नव्या आयटी नियमांवरुन हा सगळा वाद सुरु होता. त्या पार्श्वभूमीवरच घडलेल्या घटनेमुळे आणखीनच वाद ताणला जाण्याची शक्यता आहे. मात्र, ट्विटरने आता सारवासारव करुन आपली चूक पुन्हा दुरुस्त केली आहे.

ट्विटरमधील सुत्रांनी याबाबत म्हटलंय की, व्यंकय्या नायडूंचं ट्विटर अकाउंट गेल्या वर्षीच्या जुलैपासून सक्रिय नसल्याकारणाने त्यांचं ब्लू टीक निघालं होतं. व्यंकय्या नायडूंचं ट्विटर हँडल @MVenkaiahNaidu ला 1.3 दशलक्ष फोलोवर्स आहेत. या अकाउंटवरुन शेवटचं ट्विट 23 जुलै 2020 ला करण्यात आलं आहे.

ट्विटरच्या अटी आणि नियमांनुसार जर कोणी हँडलचं नाव बदललं तर ब्लू टिक हटवली जाते. तसंच एखादं अकाउंट सक्रिय नसेल, अपडेट नसेल्यास अनव्हेरिफाइड केलं जातं. तसंच ज्या कारणासाठी अकाउंट व्हेरिफाय केलं होतं ते राहिलं नसेल तर अकाउंट अनव्हेरिफाइड करण्यात येतं. समजा एखाद्या उच्चपदस्थ अधिकाऱ्याने कार्यालय सोडल्यास आणि व्हेरिफिकेशनचे निकष पूर्ण करत नसल्यास ब्लू टिक हटवली जाते.