भोपाळ- मध्य प्रदेशमध्ये सत्ताधारी भारतीय जनता पक्षाच्या प्रदेश कार्यालयात छेडछाड झाल्याचा आरोप झाल्याने खळबळ उडाली आहे. एका मुलीने व्हिडिओ जारी करत म्हटलंय की, राजधानी भोपाळमध्ये असलेल्या भाजप कार्यालयात एका वयस्कर व्यक्तीने छेडछाड केली आहे. व्हिडिओ व्हायरल झाल्यानंतर प्रदेशातील राजकीय वातावरण तापू लागलं आहे. काँग्रेसने हा व्हिडिओ शेअर करत मुख्यमंत्री शिवराज सिंह चौहान यांच्यावर निशाणा साधला. असे असले तरी महिलेने पोलिसात तक्रार दाखल केलेली नाही. तरुणीने सांगितलंय की, आपले राजकीय ज्ञान वाढवण्यासाठी ती भाजपच्या कार्यालयात असलेल्या नानाजी देशमुख लायब्रेरीमध्ये जायची. 12 मार्चला कार्यालयातील लायब्रेरीमध्ये एक वयस्कर त्यांच्या जवळ येऊन बसला आणि त्यांची छेड काढू लागला. 

तरुणीने सांगितलं की, 'व्यक्तीने तिच्या एका मैत्रीणीचीही छेड काढण्याचा प्रयत्न केला. तो म्हणायचा, तुझ्याकडे मोटारसायकल आहे, तर मला घरी सोडत जा.  त्यानंतर तरुणीच्या मैत्रीनेने त्रासाला कंटाळून व्यक्तीला व्हॉट्सऍप आणि इतर ठिकाणी ब्लॉक केलं.' व्हिडिओ व्हायरल झाल्यानंतर काँग्रेस प्रवक्ता सैय्यद जाफर यांनी मुख्यमंत्री शिवराज यांच्यावर निशाणा साधला. चारित्र्याच्या बढाया मारणारे मामाजी पाहा, तुमच्या भाचीसोबत काय होत आहे? ती नानाजी यांच्या संस्काराचे अनुकरण करण्यासाठी गेली होती, पण भाजपच्या कार्यालयात तिच्यासोबत हे काय होत आहे?, असं ते म्हणाले. दुसरीकडे भाजपने म्हटलंय की, व्हिडिओचा तपास करुन सत्य काय आहे हे पाहिलं जातंय.

पंतप्रधान शेतकरी सन्मान योजनेतील अपात्र लाभार्थी, आयकर भरणाऱ्या शेतकऱ्यांकडून...

प्रदेश काँग्रेस मीडिया समन्वयक नरेंद्र सलूजा म्हणाले की, 'भाजप कार्यालयाशी जोडल्या गेलेल्या या प्रकरणाला गंभीरतेने घेणे आवश्यक आहे. प्रकरणाचा तपास निष्पक्ष पद्धतीने व्हायला हवा, अशी आमची मागणी आहे. पोलिसांनी तत्काळ दोन्ही तरुणींचे जबाब घेऊन दोषींविरोधात कारवाई करायला हवी. त्यांनी म्हटलं की, भाजप नेतृत्वाने याप्रकरणी स्पष्टीकरण द्यायला हवं.' 'लाईव्ह हिंदूस्तान'ने यासंबंधी वृत्त दिलं आहे