बिहारच्या गोपालगंज येथे एक वेगळेच प्रेम प्रकरण समोर आले आहे. प्रेमात वेडी झालेल्या मामीने पतीला सोडून देत पळून जाऊन भाचीसोबत लग्नगाठ बांधल्याचा प्रकार समोर आला आहे. या दोघींनी पळून जाऊन लग्न केल्यानंतर सोशल मीडियाच्या माध्यमातून याबद्दलची माहिती घरच्यांना कळवली. या दोघींमध्ये गेल्या तीन वर्षांपासून प्रेमसंबंध होते असे सांगितले जात आहे.

बिहारमधील बेलवा येथील रहिवासी असलेल्या या मामी-भाचीने सर्व नाते बाजूला सारत दुर्गा मातेच्या मंदिरात आपलं लग्न उरकलं. मंदिरात पार पडलेल्या या लग्न सोहळ्यात सर्व रिती-रिवाज पूर्ण करण्यात आले. यादरम्यान दोघींनी एकमेकींना वरमाला देखील घातल्या इतकंच नाही तर गळ्यात मंगळसूत्र घालून सात फेरे देखील घेतले.

भाची शोभा हिच्या प्रेमात वेडी झालेल्या सुमन यांनी सांगितलं की शोभा खूपच सुंदर आहे. मला भीती वाटत होती की तिचं लग्न दुसरीकडे कुठेतरी होऊन जाईल आणि ती मला सोडून निघून जाईल. या भीतीपोटी आम्ही सर्वकाही सोडून देऊन मंदिरात लग्न केलं. तर शोभाने सांगितलं की सासामुसा मंदिरात आम्ही लग्न केले आहे. लग्न केल्यानंतर आम्ही सोबत राहण्याची शपथ घेतल्याचेही त्यांनी सांगितले.

दरम्यान गोपालगंज येथील या मामी-भाचीचे लग्न चर्चेचा विषय बनला आहे. या अनोख्या लग्नाची सध्या सगळीकडे चर्चा होत आहे. सोशल मीडियावर या दोघींना आपल्या लग्नाची माहिती घरच्या मंडळींना दिली आहे. या व्हिडीओमध्ये दोघी स्वतःत्या मर्जीने लग्न करत असल्याचे सांगताना दिसत आहेत.