नवी दिल्ली : ब्रिटनचे परराष्ट्र सचिव जेम्स क्लेव्हरली (James Cleverly) यांनी आज (बुधवार) एस जयशंकर यांच्यासमोर ब्रिटीश ब्रॉडकास्टिंग कंपनीच्या (British Broadcasting Company BBC) कार्यालयांवर आयकर विभागाच्या (IT) सर्वेक्षणाचा मुद्दा उपस्थित केला.

यादरम्यान जयशंकर (S Jaishankar) यांनी ब्रिटनच्या परराष्ट्रमंत्र्यांना सडेतोड उत्तर दिलं. जयशंकर म्हणाले, भारतात काम करणाऱ्या सर्व संस्थांनी कायदे आणि नियमांचं पूर्णपणे पालन केलं पाहिजे. क्लेव्हरलींनी एजन्सीला सांगितलं की, त्यांनी आयटी सर्वेक्षणाचा मुद्दा जयशंकर यांच्याकडं मांडला होता.

जेम्स क्लेव्हरली भारत दौऱ्यावर

जेम्स क्लेव्हरली जी-20 परिषदेत सहभागी होण्यासाठी भारतात आले आहेत. क्लेव्हरली आणि जयशंकर यांची आज सकाळी द्विपक्षीय बैठक झाली. भारताच्या परराष्ट्र मंत्र्यांनी सांगितलं की, यंग प्रोफेशनल स्कीम सुरू केल्याबद्दल त्यांनी भारताचं विशेष कौतुक केलं.

विशेष म्हणजे, गेल्या महिन्यात आयटी टीमनं बीबीसीच्या मुंबई आणि दिल्लीतील कार्यालयांची झडती घेतली होती. तीन दिवस चाललेल्या या सर्वेक्षणात असं दिसून आलं की, बीबीसीनं भारतातील त्यांच्या कामकाजाच्या अनुषंगानं त्यांचं उत्पन्न आणि नफा उघड केला नाही.

बीबीसीनं कर योग्य पद्धतीनं भरला नसल्याचं तपासात समोर आलं. यावेळी आयटी पथकानं कर्मचाऱ्यांचे जबाब घेऊन पुरावे गोळा केले.

वादग्रस्त माहितीपटामुळं बीबीसी चर्चेत

अलीकडं बीबीसी आपल्या वादग्रस्त माहितीपटामुळं चर्चेत आली आहे. हा माहितीपट 2002 च्या गुजरात दंगलीवर आधारित होता. केंद्र सरकारनं या माहितीपटाच्या प्रदर्शनावर बंदी घातलीये. अनेक विरोधी पक्षांनीही सरकारच्या या निर्णयावर टीका केली आहे.