नवी दिल्ली - राष्ट्रीय लोकशाही आघाडी (एनडीए) घटकपक्षांच्या विश्वासावर उभी असल्याचा दावा पंतप्रधान नरेंद्र मोदी यांनी केला असला तरीसुद्धा केंद्रीय मंत्रिमंडळाच्या स्थापनेनंतर महाराष्ट्रातील शिवसेना आणि राष्ट्रवादी काँग्रेस या दोन पक्षांतील नाराजी उघड झाली आहे. या दोन्ही पक्षांचे मिळून आठ खासदार निवडून आलेले असताना त्यांना एकच राज्यमंत्रिपद (स्वतंत्र प्रभार) मिळाले आहे.

लोकसभा निवडणुकीत शिवसेनेचे सात खासदार निवडून आले असून राष्ट्रवादी काँग्रेसचा एकच खासदार निवडून आला आहे. या मंत्रिमंडळात शिवसेनेला एक कॅबिनेट मंत्रिपद व एक राज्यमंत्रिपद तर राष्ट्रवादी काँग्रेसला एक कॅबिनेट मंत्रिपद मिळेल असे वाटत होते.

प्रत्यक्षात सात खासदारांचा पाठिंबा देणाऱ्या शिवसेनेच्या प्रताप जाधव यांना राज्यमंत्रिपद (स्वतंत्र प्रभार) मिळाले आहे. उपमुख्यमंत्री अजित पवार यांच्या नेतृत्वाखालील राष्ट्रवादी काँग्रेसला तर तेही समाधान मिळू शकलेले नाही. आता त्यामुळे दोन्ही पक्षांत नाराजीचे सूर उमटू लागले आहे. शिवसेनेचे खासदार श्रीरंग बारणे यांनी याबाबत उघड नाराजी व्यक्त केली आहे. शिवसेनेला कॅबिनेट मंत्रिपद अपेक्षित आहे असे त्यांनी म्हटले आहे.

काही पक्षांना झुकते माप

बिहारचे माजी मुख्यमंत्री जीतनराम मांझी यांच्या ‘हम’ पक्षाचे ते स्वतः एकमेव खासदार म्हणून निवडून आले असले तरी त्यांना कॅबिनेट मंत्रिपद मिळाले आहे. बिहारचे चिराग पासवान यांच्या लोकजनशक्ती पक्षाचे ५ खासदार असताना त्यांना कॅबिनेट दर्जाचे मंत्रिपद मिळाले आहे व दोनच खासदार असलेल्या जयंत चौधरीच्या राष्ट्रीय लोक दलासही एक राज्यमंत्रिपद (स्वतंत्र प्रभार) मिळाले आहे.

शिवसैनिकांनो एकत्र या!

दिल्लीतील महाराष्ट्र सदनच्या बाहेर आज एक पोस्टर लागले असून त्यावर ‘शिवसैनिकांनो एकत्र या!’ असे आवाहन करण्यात आले आहे. शिवसेनेच्या दोन्ही गटांनी आता एकत्र येण्याची आवश्यकता असल्याचे यातून सूचित करण्यात आले आहे. या फलकावर कुणाचेही नाव नाही. कोणत्या गटाच्या कार्यकर्त्यांनी हा फलक लावला आहे, याचा त्यावर उल्लेख नसला तरी नाराज असलेल्या शिवसेना खासदाराच्या कार्यकर्त्यांनी हा फलक लावला असेल असे बोलले जात आहे.