नवी दिल्ली : पुलवामा हल्ल्यात सहभाग असणाऱ्या जैश-ए-मोहम्मद (JeM) या प्रतिबंधित संघटनेच्या कमांडर आशिक अहमद नेंगरूला भारत सरकारकडून दहशतवादी घोषित करण्यात आले आहे. नेंगरूचा जम्मू-काश्मीरमधील विविध दहशतवादी घटनांमध्ये हात असल्याचा आरोप आहे. नेंगरू भारताच्या सुरक्षेदृष्टीने धोकादायक बनला असून, याच पार्शभूमीवर त्याला दहशतवादी प्रतिबंध कायदा, 1967 (1967 चा 37) च्या तरतुदींनुसार दहशतवादी म्हणून घोषित करण्यात आल्याचे मंत्रालयाकडून स्पष्ट करण्यात आले आहे. (India Declared Jaish e Mohammad Commander As A Terrorist)

केंद्रीय गृह मंत्रालयाने सोमवारी जारी केलेल्या अधिसूचनेत म्हटले आहे की, आशिक अहमद नेंगरूजैश-ए-मोहम्मदचा एक क्रूर दहशतवादी असून, जम्मू-काश्मीरमध्ये दहशतवाद्यांच्या घुसखोरीमध्येही त्याचा हात असल्याचे सांगण्यात आले आहे. यासोबतच केंद्रशासित प्रदेशात विविध दहशतवादी घटना घडवून आणण्यातही आशिक अहमद नेंगरूचा हात होता. याशिवाय नेंगरू काश्मीरमध्ये दहशतवादी सिंडिकेट चालवत असून, त्याचा जम्मू-काश्मीरमध्ये दहशत पसरवण्याच्या मोहिमेतही सहभाग असल्याने मंत्रालयाने म्हटले आहे.