केंद्रीय आरोग्य राज्यमंत्री अश्विनी कुमार चौबे (Ashwini Kumar Choubey) यांच्या ताफ्यात सामील असलेल्या पोलिस वाहनाला रविवारी रात्री अपघात झाला. या अपघातात चार पोलिस (Police) आणि चालकासह पाच जण जखमी झाले आहेत.

या सर्वांवर डुमराव उपविभागीय रुग्णालयात उपचार सुरू आहेत. केंद्रीय मंत्री स्वत: सर्व जखमींना घेऊन रुग्णालयात पोहोचले आणि रात्री उशिरापर्यंत तिथंच थांबले. बक्सरहून पाटण्याकडं परतत असताना मथिला-नारायणपूर मार्गावरील डुमरावनजीक कोरानसराई पोलिस ठाण्याचं वाहन शेतात उलटलं. त्याच्या शेजारीच चालणाऱ्या इनोव्हा कारमध्ये केंद्रीय मंत्री बसले होते. जखमींपैकी दोघांना गंभीर दुखापत झालीये.

या घटनेची माहिती खुद्द केंद्रीय मंत्र्यांनी ट्विट करून दिलीये. त्यांनी अपघाताचा व्हिडिओ ट्विट करून सांगितलं की, बक्सरहून पाटण्याला जात असताना डुमरावच्या मथिला-नारायणपूर रस्त्यावर धावणाऱ्या पोलिसांच्या वाहनाला अपघात झाला. दोन पोलिसही जखमी झाल्याचं त्यांनी सांगितलं.

मंत्री पुढं म्हणाले, 'आपण स्वतः सर्व जखमींना डुमराव रुग्णालयात नेलं असून त्यांच्यावर उपचार सुरू आहेत.' नुकतंच बिहारमधील बक्सरमध्ये काही आंदोलकांनी केंद्रीय मंत्री अश्विनी चौबे यांच्या ताफ्याला रोखून घोषणाबाजी केली. त्यांची गाडी पाहून आंदोलकांनी घेराव घातला.