Nisith Pramanik : केंद्रीय मंत्री निसिथ प्रामाणिकांच्या ताफ्यावर दगडफेक करण्यात आल्याचा प्रकार समोर आला आहे.

पश्चिम बंगालच्या कूचबिहारच्या दिनहाटा भागात ही घटना घडली असून, निसिथ पक्षाच्या कार्यकर्त्यांना भेटण्यासाठी निघाले होते. त्यावेळी हा हल्ला करण्यात आला आहे. जमावाला नियंत्रणात आणण्यासाठी पोलिसांकडून अश्रूधुराच्या नळकांड्या फोडल्या आहेत.

स्थानिक सूत्रांनी दिलेल्या माहितीनुसार, प्रामाणिक यांचा शनिवारी दिनहाटाच्या बुरीरहाट भागात कार्यक्रम होता. या कार्यक्रमावेळी टीएमसी कार्यकर्त्यांकडून निसिथ यांना काळे झेंडे दाखवत निषेध करण्यात येणार होता.

प्रामाणिक यांच्या या दौऱ्यासाठी पुरेशी सुरक्षा व्यवस्था ठेवण्यात आली होती. मात्र, निसिथ दाखल झाल्यानंतर एकच गोंधळ उडाला. यावेळी ताफ्यावर दगडफेक करण्यात आली. हा हल्ला तृणमूलच्या समर्थकांनी केल्याचा आरोप प्रामाणिक यांनी केला आहे.

जर एखादा मंत्री सुरक्षित नसेल, तर तुम्ही सामान्य माणसाच्या दुरवस्थेची कल्पना करू शकता. ही घटना बंगालमधील लोकशाहीची स्थिती दर्शवते, असे म्हणत हा हल्ला तृणमूल काँग्रेसच्या समर्थकांनी केल्याचा आरोप प्रामाणिक यांनी केला आहे.

काही दिवसांपूर्वी केंद्रीय मंत्र्याच्या घराला टीएमसी समर्थकांनी घेराव घातला होता. यावरून कूचबिहारमध्ये प्रचंड तणाव निर्माण झाला होता. त्यानंतर आज केंद्रीय मंत्र्यांच्या ताफ्यावर हल्ला करण्यात आला आहे.