कोरोना विषाणूचा वाढता संसर्ग रोखण्यासाठी प्रशासन युद्धपातळीवर काम करत आहे. शहरापासून गावखेड्यापर्यंत प्रत्येक ठिकाणी कोविड सेंटर आणि लसीकरण केंद्र उभारण्यात आली आहेत. तसंच वेळोवेळी नागरिकांची कोविड चाचणीदेखील करण्यात येत आहे. यासाठ वैद्यकीय कर्मचारी सातत्याने प्रयत्नशील आहेत. मात्र, एका नववधूची कोविड चाचणी करणं उत्तर प्रदेशातील एका आरोग्य कर्मचाऱ्याला (UP Health Department) महागात पडली आहे. नववधूचा पदर डोक्यावरुन दूर सारल्यामुळे या आरोग्य कर्मचाऱ्याला चक्क गावकऱ्यांनी मारहाण केली आहे. (villagers beaten medical team during corona testing)

अलीगढ जिल्ह्यात असलेल्या टप्पल (Tappal) परिसरातील साहा नगर सोरौला या गावात हा प्रकार घडला आहे. या गावातील प्रत्येक नागरिकाची कोविड चाचणी सुरु होती. त्यामध्येच एका नववधूची चाचणी करण्यावरुन या कोविड सेंटरवर हाणामारी झाल्याचं समोर आलं.

गावात कोविड चाचणी होत असतानाच एक नववधू (Newly married girl) कोरोना चाचणी करण्यास आली. त्यावेळी स्वॅब टेस्ट करण्यासाठी या नववधूला डोक्यावरील पदर दूर करण्यास सांगितला. परंतु, या वेळी या महिलेच्या आजुबाजूला गावातील काही ज्येष्ठ पुरुष मंडळी व युवक असल्यामुळे या महिलेने पदर दूर करण्यास नकार दिला. त्यामुळे लॅब टेक्निशिअन सौरभ अत्री यांनी गावकऱ्यांना काही वेळ बाहेर उभं राहण्याचा सल्ला दिला. त्यावरुन संतप्त झालेल्या गावकऱ्यांनी सौरभ अत्री यांना मारहाण करण्यास सुरुवात केली.

दरम्यान, सौरभ अत्री यांनी ज्येष्ठांचा अपमान केल्याचं म्हणत या गावकऱ्यांनी त्यांना मारहाण केली. सोबतच दोन अन्य आरोग्य कर्मचाऱ्यांनाही मारहाण झाली आहे. या प्रकरणी सध्या टप्पल पोलिस ठाण्यात अज्ञातांविरोधात तक्रार दाखल करण्यात आली आहे.