नवी दिल्ली : पंतप्रधान नरेंद्र मोदी यांनी ANI या वृत्तसंस्थेला आज मुलाखत दिली आहे. आगामी पाच राज्यांच्या निवडणुकीच्या तोंडावर त्यांनी दिलेल्या या मुलाखतीमध्ये अनेक विषयांवर भाष्य केलं आहे. सामान्यत: पंतप्रधान मोदी माध्यमांच्या प्रश्नांना उत्तर देण्यासाठी पत्रकार परिषद घेत नाहीत, अशी टीका विरोधक सातत्याने करतात. आजही पंतप्रधान मोदींनी मुलाख दिल्याने त्याकडे सर्वांचं लक्ष लागून राहिलं आहे. पंतप्रधान मोदींनी या पाचही राज्यांच्या निवडणुकीमध्ये आपणच विजयी होणार असल्याचं ठासून सांगितलं आहे. (Assembly Election 2022)

यावेळी बोलताना त्यांनी अखिलेश यादव आणि जयंत चौधरी यांच्यावर हल्लाबोल केला आहे. त्यांनी म्हटलंय की, आपण याआधीही दोन मुलांचा खेळ पाहिला आहे. ते इतके उद्धट आहेत की, त्यांनी याआधी 'गुजरात के दो गधे' असा उल्लेख केला होता. त्यानंतर यूपीने त्यांना धडा शिकवला आहे. आणखी एकेवेळी त्यांच्यासोबत 'दोन मुले आणि एक बुवाजी' त्यांच्यासोबत होत्या. मात्र, तरीही काही गणित जमलं नाही, अशी टीका मोदींनी यूपीतील भाजपच्या विरोधकांवर केली आहे.

पुढे ते म्हणाले की, जिथे जिथे भाजपला स्थैर्याने काम करण्याची संधी देण्यात आली आहे, तिथे तुम्हाला सत्ताविरोधी नव्हे तर प्रो-इन्कम्बन्सीचे वातावरण पाहायला मिळेल. भाजप नेहमीच प्रो-इन्कम्बन्सीसह निवडणुकीत उतरतो, असा दावा त्यांनी केला आहे.

भाजप नेहमीच जनतेच्या सेवेत सहभागी असतो. सत्तेत असताना आम्ही 'सबका साथ, सबका विकास' हा मंत्र घेऊन काम करतो. मला सर्व राज्यांमध्ये भाजपची लाट दिसत आहे. आम्ही प्रचंड बहुमताने विजयी होऊ आणि 5 राज्यांतील लोक आम्हाला त्यांची सेवा करण्याची संधी देतील, असंही त्यांनी म्हटलंय.