Coronavirus UP Update : कोरोनाच्या (Covid-19) दुसऱ्या लाटेने उत्तर प्रदेशमध्ये हाहा:कार माजवलाय. सर्वसामान्य नागरिकांबरोबरच राजकीय नेत्यांनाही याचा फटका बसला आहे. योगी आदित्यनाथ रकारमधील पूर आणि नियंत्रण राज्यमंत्री विजय कश्यप यांचे कोरोनामुळे निधन झाले. 29 एप्रिल रोजी 56 वर्षीय विजय कश्यप यांना कोरोनाचा संसर्ग झाला होता. तेव्हापासून विजय कश्यप (vijay kashyap) यांनी कोरोनाविरोधात झुंज दिली. अचानक तब्येत बिघडल्याने कश्यप यांना गुरुग्राममधील मेदांता रुग्णालयात दाखल करण्यात आले होते. या रुग्णालयात उपचारादरम्यान त्यांचा मृत्यू झाला. विजय कश्यप हे उत्तर प्रदेशातील मुझफ्फरनगरच्या चरथावल विधानसभेचे आमदार होते. मुख्यमंत्री योगी आदित्यनाथ(CM yogi adityanath), उप मुख्यमंत्री केशव मौर्य यांच्यासह भाजपच्या प्रमुख नेत्यांनी दु:ख व्यक्त केलं आहे.

कोरोनामुळे निधन झालेले तिसरे मंत्री

विजय कश्यप कोरोनामुळे निधन झालेले उत्तर प्रदेशमधील तिसरे मंत्री आहेत. याआधी कमलरानी वरुण आणि चेतन चौहान यांचं कोरोनामुळे निधन झालं होतं.

सातव्या आमदाराचा कोरोनामुळे मृत्यू -

उत्तर प्रदेशमधील सात आमदाराचा आतापर्यंत कोरोनामुळे मृत्यू झाला आहे. विजय कश्यप यांच्याआधी दल बहादूर कोरी, केसर सिंह, रमेश दिवाकर, सुरेश श्रीवास्तव, कमलरानी वरुण आणि चेतन चौहान यांचा कोरोनामुळे मृत्यू झाला आहे.