लखीमपूर खेरी : उत्तर प्रदेशच्या लखीमपूर खेरी (Uttar Pradesh Lakhimpur Kheri) येथील टिकुनिया घटनेचा मुख्य साक्षीदार प्रभूजोत सिंगचा धाकटा भाऊ सर्वजीत सिंग याच्यावर मुंडन समारंभात प्राणघातक हल्ला झाला आहे.

टिकुनिया प्रकरणातील मुख्य साक्षीदार प्रभूजोतनं आरोप केलाय की, टिकुनिया प्रकरणातील मुख्य आरोपी आशिष मिश्रा (Ashish Mishra) याच्या सांगण्यावरून माझ्या भावावर जीवघेणा हल्ला झाला आहे. हे प्रकरण लखीमपूर खेरीच्या टिकुनिया कोतवाली क्षेत्राशी संबंधित आहे. जिथं टिकुनिया घटनेचा साक्षीदार प्रभूजोत सिंग 9 डिसेंबरला आपल्या धाकट्या भावासोबत मुंडन समारंभासाठी गेला होता. तिथं उपस्थित असलेल्या विकास चावलानं त्याच्या भावावर तलवारीनं प्राणघातक हल्ला. यामध्ये त्याचा भाऊ सर्वजीत सिंग गंभीर जखमी झाला असून सर्वजीतला उपचारासाठी रुग्णालयात दाखल करण्यात आलं आहे.

टिकुनिया घटनेचा साक्षीदार प्रभूजोत सिंग म्हणाला, या खटल्याची सुनावणी 16 तारखेपासून सुरू होणार आहे. यामुळंच लहान भावावर दबाव टाकण्यासाठी हल्ला करण्यात आला. याआधीही त्याच्यावर हल्ला झाला होता. आता माझ्या धाकट्या भावावर टिकुनिया प्रकरणातील मुख्य आरोपी आशिष मिश्राचा माजी लेखापाल विकास चावलानं त्याच्या साथीदारासह तलवारीनं हल्ला केला. यात माझा लहान भाऊ गंभीर जखमी आहे. याप्रकरणी पोलीस प्रशासनाकडून कोणतीही कारवाई केली जात नसल्याचा आरोप प्रभूजोतनं केलाय.