लखनऊ : उत्तरप्रदेशमधील शाहजहांपूर येथे एका ट्रान्सपोर्ट कंपनीच्या मॅनेजरची काठीने बेदम मारहाण करत हत्या करण्यात आली आहे. या घटनेचा थरारक व्हिडिओ सोशल मीडियावर व्हायरल झाला आहे. या मॅनेजरवर चोरीचा ठपका ठेवत त्याची हत्या करण्यात आली.

अधिक माहितीनुसार, शिवम जौहरी (३२) असं हत्या झालेल्या मॅनेजरचे नाव आहे. त्याला खांबाला बांधून मारहाण करतानाचा व्हिडिओ सोशल मीडियावर व्हायरल झाल्यानंतर शिवमच्या वडिलांनी व्यापारी नीरज गुप्ता आणि ट्रान्सपोर्ट कंपनीचे मालक बंकीम सुरी यांच्यासह सात लोकांविरोधात खुनाची तक्रार दाखल केली होती. त्यानंतर पोलिसांनी सहा आरोपींना ताब्यात घेतले आहे.

शिवमचे वडील अधीश जौहरी यांनी सांगितलं की, "शिवम हा मागच्या सात वर्षापासून शाहजहांपूर सुरी ट्रान्सपोर्ट येथे मॅनेजर म्हणून काम करत होता. मंगळवारी सायंकाळी त्याला गंभीर जखमी अवस्थेत हॉस्पिटलमध्ये दाखल केले होते.

तेथीलच कर्मचारी असलेल्या बलराम याने शिवमला करंट लागल्याचं आम्हाला सांगितलं पण आम्ही ज्यावेळी हॉस्पिटलमध्ये जाऊन बघितलं तेव्हा त्याच्या अंगावर निशाण होते. तो अवघ्या ३२ वर्षाचा होता. एका महिन्यानंतर त्याचे लग्न होणार होते." अशी माहिती त्याच्या वडिलांनी दिली आहे.

दिलेल्या तक्रारीनुसार, बुधवारी दुपारी पोलिसांनी व्यावसायिक नीरज गुप्ता, ट्रान्सपोर्टचा मालक बंकीम सूरी, कुणाल अरोरा, शिवम गुप्ता, नीरज गुप्ता यांचे लेखापाल केशव आणि एका अज्ञाताविरोधात गुन्हा दाखल केला. पोलिसांनी बंकीम सूरी यांच्यासह सहा जणांना चौकशीसाठी ताब्यात घेतले आहे. या प्रकरणाचा अधिक तपास सुरू असल्याची माहिती पोलिसांनी दिली आहे.