डेहराडून - उत्तराखंडमध्ये राजकीय संकट ओढावलं असून मुख्यमंत्री त्रिवेंद्र सिंह रावत यांच्या राजीनाम्यानंतर भाजपचे नेते धन सिंह रावत यांची मुख्यमंत्रीपदी वर्णी लागू शकते. धन सिंह रावत श्रीनगरहून डेहराडूनला पोहोचले आहेत. घाईगडबडी धन सिंह रावत यांना आणण्यासाठी हेलिकॉप्टर पाठवण्यात आलं होतं. डेहराडूनला आल्यानंतर धन सिंह रावत थेट मुख्यमंत्री त्रिवेंद्र सिंह रावत यांची भेट घेण्यासाठी पोहोचले आहेत. भाजपचे वरिष्ठ नेते आणि मंत्री मदन कौशिक हेसुद्धा त्यांच्यासोबत आहेत.

मुख्यमंत्री त्रिवेंद्रसिंह रावत यांच्या कामाच्या पद्धतीबाबत भाजप आमदारांमध्ये नाराजी असल्यानं नेतृत्वबदलाची तयारी झाली आहे. याच पार्श्वभूमीवर त्रिवेंद्र सिंह रावत राजीनामा देण्यासाठी राज्यपालांची भेट घेणार आहेत. त्याआधी ते पत्रकार परिषद घेणार असल्याचंही सागंण्यात येत आहे. 

भाजप आमदार मुन्ना सिंग चौहान यांनी सांगितलं की, पक्षाच्या वरिष्ठ नेत्यांशी याबाबत चर्चा सुरु आहे. दिल्लीत वरिष्ठ नेत्यांची सोमवारी भेट घेतली. त्यांना पक्षाच्या प्रमुखांकडून फोनही आला होता. भाजपचे सर्व 57 आमदार मुख्यमंत्र्यांसोबत आहेत. 

हे वाचा - उत्तराखंडमध्ये भाजप भाकरी फिरवणार?

त्रिवेंद्र सिंह रावत हे कोणत्याही क्षणी राजीनामा देऊ शकतात. यावरून राज्यात राजकीय उलथापालथ सुरु आहे. सीएम रावत यांनी पहिल्यांदाच आमदार बनलेल्या धन सिंह रावत यांचे नाव सुचवले आहे. यामुळेच धन सिंह रावत हे घाईने डेहराडूनला पोहोचले आहेत. याशिवाय राज्यात एक उपमुख्यमंत्री असणार आहे. यासाठी पुष्कर सिंह धामी यांचे नाव आघाडीवर आहे. सायंकाळी चारच्या सुमारास त्रिवेंद्र सिंह रावत राज्यपालांची भेट घेतील. याचवेळी ते राजीनामा देतील असं म्हटलं जात आहे.