उत्तराखंडच्या निवडणुकीत ७० जागांसाठी मतदान झाले असून १० मार्चला निकाल लागणार आहे. पाच राज्यांच्या निवडणुकांची मतदान प्रक्रिया आज पूर्ण झाली असून एक्झिट पोल समोर येत आहेत. यामध्ये न्यूज एक्सने उत्तराखंडचा एक्झिट पोल जाहीर केला असून यामध्ये काँग्रेसला ३३ ते ३५ जागा तर भाजपला ३० ते ३३ जागा मिळतील असा अंदाज व्यक्त करण्यात आला आहे. तर आम आदमी पक्ष जास्ती जास्त ३ जागा जिंकू शकतो असं म्हटलं आहे. एक्झिट पोलचे आकडे पाहता यामध्ये आम आदमी पार्टीने ३ जागा जिंकल्यास राज्यात किंगमेकरच्या भूमिकेतही ते पहायला मिळू शकतात.

उत्तराखंडमध्ये १३ जिल्ह्यातील ७० विधानसभा मतदारसंघात १४ फेब्रुवारी रोजी मतदान झालं. यावेळी मतदानाची टक्केवारी वाढली असून ६२ टक्के मतदान झालं आहे. २०१७ मध्ये उत्तराखंडमध्ये ६५.५६ टक्के मतदान झालं होतं. उत्तराखंडमधील ही पाचवी विधानसभा निवडणूक आहे. आधीच्या चार निवडणुकांमध्ये दोन वेळा काँग्रेस आणि दोन वेळा भाजपचं सरकार सत्तेत आलं होतं.

२०१७ मध्ये भाजपने विक्रमी जागा जिंकून सत्ता मिळवली होती. यावेळी पुन्हा भाजप सत्तेत आल्यास पहिल्यांदाच एखाद्या पक्षाला उत्तराखंडमध्ये सलग सत्ता मिळेल.उत्तराखंडमध्ये भाजपने पुष्कर सिंह धामी यांना मुख्यमंत्री पदाचे उमेदवार जाहीर केलं आहे. २०१७ मध्ये भाजपने उत्तराखंडमध्ये ७० पैकी ५६ जागा जिंकल्या होत्या. तर काँग्रेसला ११ जागा राखता आल्या होत्या.