डेहराडून : उत्तराखंडमध्ये महामार्गाची सुरक्षा भिंत कोसळल्याने सुमारे 10,000 लोक अडकले असल्याची माहिती समोर आली आहे. उत्तराखंडमधील यमुनोत्री मंदिराकडे जाणाऱ्या महामार्गावर ही सुरक्षा भिंत कोसळल्याची घटना घडली आहे. त्यामुळे मोठ्या प्रमाणावर वाहतुक ठप्प झाली असून महामार्गालगत विविध ठिकाणी 10 हजार लोक अडकल्याचे सांगण्यात येत आहे.

(Yamunotri Road Wall Collapse)

सूत्रांनी दिलेल्या माहितीनुसार, ज्या रस्त्यावर सुरक्षा भिंत कोसळली आहे तो रस्ता पूर्ववत करण्यासाठी ३ दिवस लागू शकतात असं सांगितलं जातंय. दरम्यान या रस्त्यावरून वाहतुक करणाऱ्या प्रवाशांचा खोळंबा झाला आहे. मोठ्या प्रमाणावर पर्यटकही अडकल्याची माहिती समोर आली असून स्थानिक लोकांच्या मदतीने अडकलेल्या प्रवाशांना बाहेर काढण्याचे काम चालू आहे.

लोकांना बाहेर काढण्यासाठी जिल्हा प्रशासनाकडून मदत करण्यात येत आहे. लहान वाहनांमधून काही प्रवाशांना बाहेर काढण्याचा प्रयत्न केला जात आहे. पण मोठ्या वाहनांमधील लोकांना तसेच लांबून आलेल्या प्रवाशांना बाहेर काढण्यासाठी अडचणी येत असल्याची माहिती आहे. तसेच रस्त्यावरील अडथळा दूर करण्यासाठीही प्रयत्न केले जात आहेत.