Uttarkashi Tunnel Collapse Rescue: ब्रह्मखाल-यमुनोत्री राष्ट्रीय महामार्गावर सिलक्यारा आणि डंडालगाव यांच्यादरम्यान बांधण्यात येत असलेल्या एका बोगद्याचा काही भाग आज कोसळला. त्यामुळे बोगद्यात किमान ४० कामगार अडकले आहेत. आज सकाळी सहा ते सातच्या दरम्यान ही दुर्घटना घडल्याची माहिती पोलिसांनी दिली. भूस्खलनामुळे ही दुर्घटना घडल्याचा प्राथमिक अंदाज आहे.

पोलिस आणि ‘एनडीआरएफ’च्या पथकांनी तातडीने मदतकार्य सुरू केल्याची माहिती उत्तरकाशीचे पोलिस अधीक्षक अर्पण यदुवंशी यांनी दिली. आतमध्ये अडकलेल्या मजुरांना ऑक्सिजन मिळत राहावा यासाठी बोगद्याचा जो भाग कोसळला आहे, त्या भागातून ऑक्सिजनचा पाइप आतमध्ये सोडण्यात आला आहे, असेही यदुवंशी यांनी सांगितले.

‘चार धाम’साठी विशेष प्रकल्पांतर्गत नवे रस्ते बांधण्यात येत आहेत. त्या प्रकल्पाचा एक भाग म्हणूनच हा रस्ता तयार करण्यात येत आहे. या बोगद्यामुळे उत्तरकाशी ते यमुनोत्री हे अंतर २६ किलोमीटरने कमी होणार आहे.

सीमा रस्ते बांधणी संघटना आणि ‘आयटीबीपी’ची पथकेही घटनास्थळी दाखल झाली आहेत. कमांडिंग अधिकारी नमन नरुला आणि असिस्टंट कमांडंट वैभव जाधव यांच्या नेतृत्वाखाली त्यांनी बचावकार्याला सुरुवात केली आहे. (latest Marathi News)

स्थानिक परिस्थिती पाहता मजुरांना बाहेर काढण्यासाठी दोन ते तीन दिवस लागू शकतात, असा अंदाज पोलिसांनी व्यक्त केला आहे.बोगद्याच्या बाहेर पाच रुग्णवाहिका सज्ज ठेवण्यात आल्या आहेत. तसेच प्राथमिक उपचारांसाठी वैद्यकीय पथकही तेथे बोलावण्यात आले आहे. उत्तरकाशीचे जिल्हाधिकारी अभिषेक रुहेला, राष्ट्रीय रस्ते प्राधिकरणाचे चीफ जनरल मॅनेजर विशाल गुप्ता आणि ‘एनडीएरएफ’चे उपप्रमुख रविशंकर बधानीही घटनास्थळी दाखल झाले आहेत. मुख्यमंत्री पुष्करसिंह धामी हेही बचावकार्यावर लक्ष ठेवून आहेत. (latest Marathi News)