उत्तराखंडच्या उत्तरकाशी येथील बोगद्यामध्ये अडकलेल्या ४० मजुरांना वाचवण्यासाठी शर्थीचे प्रयत्न सुरूच आहेत. ऑपरेशन तिसऱ्या दिवशीही सुरुच आहे. अद्याप, मजुरांना बोगद्याबाहेर काढण्यात यश आलेलं नाही. यमुनोत्री हायवेवर धरासू-बडकोटच्या बोगद्यामध्ये मजूर अडकले असून त्यांना वाचवण्याचे काम युद्ध पातळीवर सुरु आहे. आता त्यांना वाचवण्यासाठी आधुनिक तत्रांचा वापर करण्यात येणार आहे. (Latest Marathi News)

कामगारांना वाचवण्यासाठी बचावकार्य सुरू असून आज (बुधवारी) कामगारांना सुखरूप बाहेर काढले जाईल, असे तांत्रिक तज्ज्ञांचे म्हणणे आहे.

खराब झालेल्या ऑगर मशिनच्या जागी आता ड्रिलिंगसाठी दिल्लीहून अत्याधुनिक मशीन मागवण्यात येत आहे. या मशिन हवाई दलाच्या मदतीने घटनास्थळावर पोहोचवल्या जातील. मदत आणि बचाव कार्याचे नेतृत्व करणारे कर्नल दीपक पाटील म्हणाले की, ड्रिलिंगसाठी अमेरिकन बनावटीचे नवीन ऑगर मशीन मागवले जात आहे. जे वेगाने काम करेल. आता या संपूर्ण मदत आणि बचाव कार्यात मिलिटरी ऑपरेशन टीमही सक्रिय झाली आहे. (Marathi Tajya Batmya)

ऑपरेशन यशस्वीरित्या पार पाडेल- डॉ. सिन्हा

डॉ. सिन्हा म्हणाले की, जिल्हा प्रशासनाने बोगद्यात अडकलेल्या प्रत्येक व्यक्तीच्या कुटुंबीयांशी बोलून त्यांना परिस्थितीची माहिती दिली आहे. याशिवाय त्यांना सुखरूप बाहेर काढले जाईल, असे आश्वासन देण्यात आले आहे. ते म्हणाले, आम्ही हे ऑपरेशन यशस्वीपणे पार पाडू याविषयी कुणालाही शंका नसावी.

दरम्यान केंद्रीय गृह मंत्रालयाच्याही सतत संपर्कात असल्याचे आपत्ती व्यवस्थापन सचिव डॉ.सिन्हा यांनी सांगितले आहे. जी काही प्रगती आणि कार्यवाही सुरू आहे, त्याची माहिती केंद्रालाही दिली जात आहे. गृह मंत्रालयाचे अधिकारी संपूर्ण कारवाईवर सतत लक्ष ठेवून आहेत.