राजस्थानचे मुख्यमंत्री पद कोणाला मिळणार हा सस्पेन्स आता संपला आहे. भाजपने पुन्हा एकदा सर्वांना चकीत करत पहिल्यांदाच निवडणूकीत विजय मिळवून आमदार झालेले भजनलाल शर्मा यांना राज्याचे मुख्यमंत्रीपद सोपवण्यात आलं आहे.

फोटो सेशन दरम्यान शेवटच्या ओळीत उभे राहिलेल्या भजनलाल शर्मा यांचं नाव जेव्हा मुख्यमंत्री म्हणून जाहीर करण्यात आलं तेव्हा माजी मुख्यमंत्री वसुंधरा राजे यांना मोठा धक्का बसला. कारण निवडणूकांमध्ये मिळालेल्या विजयानतर त्यांना मुख्यमंत्रीपद सोपवलं जाईल याबद्दल त्यांना ठाम विश्वास होता. मुख्यमंत्रीपदासाठी वसुंधरा राजे यांनी दिल्लीचा दौरा देखील केला होता.या पार्श्वभूमीवर वसुंधरा राजे यांचा एक व्हिडीओ सोशल मीडियावर तुफान व्हायरल होतो आहे.

सोशल मीडियावर जे व्हिडीओ व्हायरल होत आहे त्यामध्ये वसुंधरा राजे एक चिठ्ठी उघडून बघताना दिसत आहेत. त्या चिठ्ठीतला मजकूर वाचून त्यांना बसलेला धक्का त्यांच्या चेहऱ्यावर स्पष्ट दिसत आहे. त्या प्रश्नार्थक नजरेने केंद्रीय पर्यवेक्षक राजनाथ सिंह यांच्याकडे पाहाताना दिसत आहेत. दावा केला जात आहे की याच चिठ्ठीतून राजे यांना नव्या मुख्यमंत्र्यांचं नाव त्यांना सांगण्यात आलं . ज्याच्या नावाचा प्रस्ताव वसुंधरा राजे यांनी विधीमंडळाच्या बैठकीत मांडला होता.

राजस्थानात भाजपने मोठा विजय मिळवल्यानंतर मुख्यमंत्रीपदाची रेस सुरू झाली. यामध्ये वसुंधरा राजे आघाडीवर होत्या, या शर्यतीत सीपी जोशी, केंद्रीय मंत्री गजेंद्र सिंह शेखावत, लोकसभा अध्यक्ष ओम बिर्ला, रेल्वे मंत्री अश्विनी वैष्णव, बाबा कमलनाथ, दीया कुमारी इत्यादी नेत्यांची नावे होती. मात्र यामधून कुठेच चर्चेत नसलेले भजनलाल शर्मा यांचे नाव समोर आल्याने आश्चर्य व्यक्त करण्यात आलं.

भजनलाल शर्मा यांचे नाव विधीमंडळ नेत्यांच्या बैठकीत मांडण्यात आलं तेव्हा वसुंधरा राजे यांचा चेहरा पडल्याचे पाहायला मिळाले, त्यांच्या चेहऱ्यावर निराशा स्पष्ट दिसत होती. यावेळी त्या भावूक देखील झाल्याचे पाहायला मिळाले. दरम्यान वसुंधरा राजे यांचा हा व्हिडीओ तुफान व्हायरल होत आहे.