कडाक्याच्या उन्हाळ्यात पार पडत असलेल्या लोकसभा निवडणुकीने नेत्यांच्या तोंडचे पाणी पळवले आहे. दरम्यान आता राहिलेल्या शेवटच्या टप्प्याची जोरदार तयारी सुरू आहे. याचवेळी काँग्रेस नेते राहुल गांधी यांच्या रॅलीत त्यांनी पाण्याने भरलेली बाटली डोक्यावर ओतल्याचे दृश्य दिसलं. ते उत्तर प्रदेशातील देवरिया येथे एका सभेला संबोधित करत होते, भाषण सुरू असताना त्यांनी पाणी प्यायला सुरुवात केली आणि नंतर म्हणाले, 'खुप गरम आहे.' यानंतर त्यांनी संपूर्ण पाण्याची बाटली डोक्यावर ओतली.

देशातील उत्तर-पश्चिमी राज्यांमध्ये कडक ऊन आहे आणि लोकसभा निवडणुकीच्या सातव्या आणि शेवटच्या टप्प्यासाठी सर्व पक्षांचे नेते रॅलींमध्ये व्यस्त आहेत. कमाल तापमान सामान्यपेक्षा ८ अंश सेल्सिअस जास्त असल्याचे सांगण्यात येत आहे. काँग्रेस नेते राहुल गांधी आणि पंतप्रधान मोदींसह अनेक नेते लोकांना उष्णतेपासून दूर राहण्याचा सल्ला देताना दिसत आहेत.

काँग्रेस नेते राहुल गांधी यांनीही देवरियाच्या सभेत बोलताना पंतप्रधान नरेंद्र मोदींवर हल्लाबोल केला आणि त्यांच्या 'देवाने मला पाठवले' या वक्तव्यावर पुन्हा एकदा प्रतिक्रिया दिली. ते म्हणाले, "...बाकी सर्व बायोलॉजिकल आहेत, पण नरेंद्र मोदी जी बायोलॉजिकल नाहीत. त्यांच्या 'देवाने' त्यांना अंबानी आणि अदानींच्या मदतीसाठी पाठवले आहे, पण 'देवाने' त्यांना शेतकरी आणि मजुरांच्या मदतीसाठी पाठवले नाही."

काँग्रेस नेते राहुल गांधी म्हणाले, "देवाने त्यांना असे पाठवले असते तर त्यांनी गरीब आणि शेतकऱ्यांना मदत केली असती. हा नरेंद्र मोदींचा देव आहे." पुढे ते म्हणाले, “काही लोक मोदींना प्रश्न विचारतात. मोदीजी, तुम्ही आंबे कसे खातात? तुम्ही धुतल्यानंतर किंवा सोलल्यानंतर खाता का? यावर मोदीजी म्हणतात की आम्ही काही करत नाही, सर्व काही आपोआप होते.

राहुल गांधी पुढे म्हणाले, "देवाने त्यांना पाठवले असते, तर देवाने तुम्हाला सांगितले असते, भारतातील सर्वात कमकुवत लोकांना मदत करा, शेतकऱ्यांना मदत करा, पण मोदीजींचा देव म्हणाला, अंबानींना मदत करा, अदाणींना मदत करा." अदानींचे 16 लाख कोटी रुपये माफ करा, तो कोणता देव आहे, तो मोदीजींचा देव आहे, असं म्हणत त्यांनी पंतप्रधान मोदींवर हल्लाबोल केला आहे.