Vistara Air India Merge : विस्तारा एअरलाइन्स आणि एअर इंडियाचे विलीनीकरण करण्यावर अखेर अंतिम निर्णय घेण्यात आला आहे. सिंगापूर एअरलाइन्सच्या बोर्डाने विलीनीकरणास मान्यता दिल्यानंतर यावर आज शिक्कामोर्तब करण्यात आले आहे. मार्च 2024 पर्यंत या दोन्ही कंपन्याचे विलीनीकरण करण्याचे निश्चित केले आहे. या करारानुसार सिंगापूर एअरलाइन्स एअर इंडियामध्ये 2058 कोटी रुपयांची गुंतवणूक करणार आहे.

हेही वाचा - दुधाच्या प्लास्टिक पिशवीचा कापलेला छोटा कोपराही घडवेल अनर्थ...

सिंगापूर एअरलाइन्सच्या बोर्डाच्या या निर्णयामुळे टाटा समूहाला मोठा दिलासा मिळाला आहे. कारण टाटाला त्यांचे चार एअरलाईन्स ब्रँड एअर इंडिया लिमिटेडमध्ये विलीन करायचे आहेत. एअर इंडिया आणि विस्तारा एअरलाइन्सच्या विलीनीकरणाबद्दल माहिती देताना, सिंगापूर एअरलाइन्सने एका निवेदनात म्हटले आहे की, सिंगापूर एअरलाइन्सच्या बोर्डाने विलीनीकरणास मान्यता दिली असून करारानुसार, विस्ताराच्या टाटा सन्सच्या संयुक्त उपक्रमाचे एअर इंडियामध्ये विलीनीकरण झाल्यानंतर सिंगापूर एअरलाइन्सकडे एअर इंडियाच्या नवीन स्वरूपातील 25.1 टक्के भागीदारी असेल. 

सध्या सिंगापूर एअरलाइन्सची टाटा एअरलाइन्समध्ये 49 टक्के हिस्सा आहे. विलीनीकरणासाठी नियामक मान्यता मिळाल्यानंतर सिंगापूर एअरलाइन्स एअर इंडियामध्ये 250 डॉलर दशलक्ष म्हणजेच 2000 कोटी रुपयांची गुंतवणूक करणार आहे. सिंगापूर एअरलाइन्स आणि टाटा यांच्यात 2022-23 आणि 2023-24 मध्ये एअर इंडियाच्या वाढीच्या ऑपरेशनला निधी देण्यासाठी अतिरिक्त भांडवली गुंतवणुकीबाबतचाही एक करार झाला आहे.